Ռոհանի. ՀԳՀԾ-ից հեռանալու վնասը հարյուր տոկոսով կրելու է ԱՄՆ-ն
ԻԻՀ նախագահը հայտարարել է, որ ՀԳՀԾ-ից հրաժարվելը կնշանակի թուլացնել միջազգային հանրությունը, դիվանագիտությունն ու բանակցությունն, ընդգծեկով. «ՀԳՀԾ-ից հեռանալու վնասը հարյուր տոկոսով կրելու է ԱՄՆ-ն»:
ԻԻՀ նախագահ Հասան Ռոհանին Նյու Յորքում ԱՄՆ-ի արտաքին քաղաքականության մի խումբ փորձագետների հետ հանդիպման ժամանակ հույս է հայտնել, որ ՀԳՀԾ-ի կողմերից որևէ մեկը սխալ թույլ չի տա և չի ոտնահարի ՀԳՀԾ-ն: Նա ասել է. «Եթե միջազգային համաձայնությունները կախված լինեն որևէ անձի անհատական ցանկություններից , դա կնշանակի աշխարհը դեպի անկարգություն առաջնորդել և ռազմական ուժ ցուցադրել»:
«ԻԻՀ-ն նախապատրաստվել է բոլոր իրավիճակների համար և եթե ԱՄՆ-ն հրաժարվի ՀԳՀԾ-ից, Իրանն այդ կապակցությամբ որևէ մտահոգություն չի ունենալու»,-ընդգծել է Ռոհանին: Նա հավելել է, որ Իրանը հավատարիմ է իր պարտավորություններին և այդ մասին են վկայում ԱԷՄԳ-ի զեկույցները:
Այն մասին, թե արդյոք Իրանը պատրաստ կլինի այլ հարցերի շուրջ բանակցել ԱՄՆ-ի հետ, Ռոհանին ասել է. «Իսլամական հեղափոխության մեծապատիվ առաջնորդը պաշտոնապես հայտարարել է, որ ԱՄՆ-ի հանդեպ Իրանի վստահության չափանիշն այս միջուկային համաձայնությունն է: Եթե ԱՄՆ-ն սխալ թույլ տա, պարզ կլինի, որ այլ հարցերի շուրջ ԱՄՆ-ի հետ բանակցությունն էլ ապարդյուն ու անօգուտ է լինելու»:
Ռոհանին անդրադառնալով Սիրիայի հարցին, ասել է. «Իրանը սկզբից հավատացած էր, որ ահաբեկչությունը չպիտի իր իշխանությունը տարածի Սիրիայի ու նրա ժողովրդի վրա, սակայն որոշ երկրներ դա չէին ընդունում: Բայց երբ նկատեցին, որ Սիրիայում ահաբեկիչները սպանում են անմեղ մարդկանց, գիտակցեցին, որ ահաբեկիչների դեմ պատերազմից ու պայքարից բացի այլ ելք չկա»:
«Եթե Միջին Արևելքում ու աշխարհի այլ տարածաշրջաններում բարդություններ ու խնդիրներ կան, դրանց լուծումը սպառնալիքը, շրջափակումն ու պատերազմը չէ: Այդ խնդիրները կարելի է կարգավորել ժողովրդավարության, ժողովրդի կամարտահայտության, բանակցության սեղանին նստելու և մտքեր փոխանակելու միջոցով»,-հայտարարել է Ռոհանին:
