Իրանը դատապարտեց Ինդոնեզիայում եկեղեցիների դեմ իրականացված ահաբեկչական հարձակումը
ԻԻՀ ԱԳ նախարարության խոսնակը դատապարտեց տասնյակ մարդկանց զոհվելու և վիրավորվելու պատճառ դարձած Ինդոնեզիայի Սուրաբայա քաղաքի երեք եկեղեցիներում իրականացված ահաբեկչական պայթյունները:
ԻՍՆԱ-ի հաղորդման համաձայն, Բահրամ Ղասեմին կիրակի օրը ցավակցելով Ինդոնեզիայի կառավարությանն ու ժողովրդին և ահաբեկչական պայթյունների զոհերի հարազատներին, ասաց. «Աշխարհի տարբեր անկյուններում ահաբեկչական դաժան քայլերն ինչ պատրվակով և որ անհատի կամ խմբի կողմից էլ իրականացվեն, դատապարտելի են»:
«Ահաբեկչական ու հակամարդկային հարձակումներին դիմակայելու միակ միջոցը դրանց տարածման գլխավոր կենտրոններն ու արմատները հստակ ճանաչելու ուղղությամբ տարածաշրջանային ու միջազգային քայլերն են, և դրա դեմ լուրջ և առանց երկակի ստանդարտների պայքարը»,-ընդգծել է Ղասեմին:
Կիրակի օրը Ինդոնեզիայի արևելյան Ջավա նահանգի կենտրոն Սուրաբայա քաղաքում գտնվող Սանթա Մարիա, Գուբենգ և Փուսաթա Սուրաբայա կաթոլիկ եկեղեցիներում տեղի ունեցած ահաբեկչական պայթյունների հետևանքով զոհվեց առնվազն 11 և վիրավորվեց 40 մարդ:
Պայթյունների պատասխանատվությունն իր վրա է վերցրել Ինդոնեզիայում ԻԼԻՊ ահաբեկչական խումբը:
