Հայաստանից ստացած էլեկտրաէներգիայի մի մասը Իրանը կվաճառի Վրաստանին
Իրանի գազի ազգային ընկերության գործադիր տնօրենը հայտնել է.«Կվերսկսեն Իրանի տարածքով Հայաստանից Վրաստան էլեկտրաէներգիայի արտահանումները»: Այս մասին հաղորդում է Իրանի ռադիո-հեռուստատեսության լրատվական ծառայությունը:
Համիդռեզա Էրաղին ասել է.«Հայաստանը Իրանից ներկրվող գազի դիմաց էլեկտրաէներգիա կմատակարարի Իրանի գազի ազգային ընկերությանը: Էլեկտրաէներգիայի մի մասը կվաճառվի Վրաստանին»:
Իրանի գազի ազգային ընկերության գործադիր տնօրենը Վրաստանին էլեկտրաէներգիա վաճառելու համար Իրան-Վրաստան բանակցության մասին ասել է.«Իրանը գազի դիմաց Հայաստանից ստանալիք էլեկտրաէներգիայի մոտ 10 տոկոսը կվաճառի Վրաստանին։ Կողմերի միջև պայմանագիրը շուտով կստորագրվի»:
Իրանը և Հայաստանը 2004 թվականին ստորագրեցին «Գազ՝ էլեկտրաէներգիայի դիմաց» պայմանագիրը 20 տարվա ժամկետով, որի համաձայն Իրանից արտահանվող գազը օգտագործվում է Հայաստանի ՋԷԿ-երի էներգաբլոկներում և դրա դիմաց Իրանը էլեկտրաէներգիա է ստանում Հայաստանից:
