Իրաքի վարչապետն ընդգծել է Իրաքից ԱՄՆ-ի զորուժի շտապ դուրսբերման անհրաժեշտությունը
Իրաքի վարչապետը հայտարարել է, որ առաջիկա օրերին այդ երկրից դուրս կբերվեն ամերիկյան ավելի շատ զինծառայողներ:
Երեքշաբթի օրը, Իրաքի բանակի հիմնադրման 100-ամյակի առիթով հղած ուղերձում, անդրադառնալով Իրաքի միջազգային հարաբերությունները հավասարակշռելու կառավարության ջանքերին և երկրից ամերիկյան զորուժի շարունակական դուրսբերմանը` որպես ռազմավարական երկխոսության ծրագրի մաս, Մուստաֆա ալ Քազեմին հավելել է. «Միացյալ Նահանգների հետ ռազմավարական երկխոսություն սկսելու առաջին իսկ օրից, մեր նպատակն էր ամերիկյան զորուժի դուրսբերումն Իրաքից»:
Մուստաֆա ալ Քազեմին նշել է, որ վերջին ամիսների ընթացքում, ժամանակացույցի համաձայն, ԱՄՆ-ի զորուժի մի մասը դուրս է բերվել Իրաքից և առաջիկա օրերին այդ գործընթացը կավարտվի, ամերիկյան զորուժի կեսից ավելիի դուսրբերմամբ:
Իրաքի «Ասաեբ Ահլ ալ-Հաղ» շարժման գլխավոր քարտուղար Ղիս ալ-Խազալին նույնպես շեշտել է Իրաքում ԱՄՆ-ի ռազմական ներկայության դադարեցման անհրաժեշտությունը, նշելով, որ ամերիկացիների ներկայությունը խոչընդոտում է Իրաքի կողմից սեփական ուժերի ձևավորմանը և իր տարածքը պաշտպանելու ինքնավստահությանը:
2020-ի հունվարի 5-ին, ԻՀՊԿ Ղոդս ստորաբաժանման հրամանատար, գեներալ Ղասեմ Սոլեյմանիի և Իրաքի Հաշդ ալ Շաբի ուժերի փոխհրամանատար Աբու Մեհդի ալ-Մոհանդեսի սպանությունից երկու օր անց, Իրաքի խորհրդարանը հաստատեց այդ երկրից ամերիկյան զորուժը դուրս բերելու մասին օրինագիծը:
