Աֆղանստանում վերջին մեկ տարվա ընթացքում գրանցվել է քաղաքացիական զոհերի ամենաբարձր թիվը

Աֆղանստանում ՄԱԿ-ի առաքելությունը (UNAMA) հաղորդել է, որ երկրում վերջին մեկ տարվա ընթացքում գրանցվել է խաղաղ բնակչության շրջանում ամենաշատ զոհերի թիվը:

Աֆղանստանում ՄԱԿ-ի առաքելությունը (UNAMA) ցավ է հայտնել Քաբուլի Սեդիղիե մզկիթում տեղի ունեցած պայթյունի և քաղաքացիական անձանց շրջանում գրանցված զոհերի կապակցությամբ, հավելելով, որ  հարձակումը հերթականն էր՝ վերջին շաբաթների ընթացքում տեղի ունեցած պայթյունների թվում: Ըստ այդ հաղորդման՝ վերջին մի քանի շաբաթների ընթացքում իրականացված հարձակումների հետևանքով կա 250  զոհ և վիրավոր, ինչը վերջին մեկ տարվա ընթացքում ամենաբարձր  ցուցանիշն է ամսական կտրվածքով:

Չորեքշաբթի օրը, Աֆղանստանի մայրաքաղաք Քաբուլի հյուսիսում գտնվող  Սարկոթել Խայրխանե  տարածքում գտնվող  Սեդիղիե մզկիթում ռումբ է պայթել, ինչի հետևանքով 30 հավատացյալ զոհվել է, ևս 40-ը վիրավորվել։