Իսրայելում ՑԱԽԱԼ-ի տասնյակ զինվորներ լքել են ռազմակայանը
«Գիվատի» բրիգադի «Ցաբար» գումարտակի տասնյակ զինծառայողներ ինքնակամ լքել են Իսրայելի հարավում տեղակայված Սդե Թեյման ռազմակայանը, ինչից հետո հրամանատարությունը պահանջել է նրանցից վերադառնալ սահմանված ժամկետում՝ սպառնալով կարգապահական տույժերով, հայտնում է The Times of Israel-ը։
Զինվորներին ուղարկված հաղորդագրության մեջ ստորաբաժանման հրամանատարը նախազգուշացրել է, որ մինչև 16:00-ն անձնակազմի ստուգում է անցկացվելու։ Նրանք, ովքեր չեն վերադառնա մինչ այդ ժամը, պաշտոնապես կճանաչվեն ինքնակամ բացակայողներ (AWOL), իսկ նրանց մասին տեղեկությունը կփոխանցվի ռազմական ոստիկանությանը։
Իսրայելի պաշտպանության բանակի (ՑԱԽԱԼ) տվյալներով՝ զինծառայողները լքել են ռազմակայանը առանց հրամանատարների թույլտվության՝ թողնելով զենքերը։ Հակամարտության պատճառ է դարձել գումարտակի հրամանատարի որոշումը՝ հանել և ոչնչացնել զինվորների տեղադրած ցուցանակները, որոնք, բանակի գնահատմամբ, նվաստացնում էին ստորաբաժանման նորակոչիկներին։
ՑԱԽԱԼ-ի ներկայացուցիչը նշել է, որ գումարտակի բոլոր զինծառայողները՝ հրամանատարից մինչև շարքայիններ, մասնակցել են մարտական գործողություններին և վտանգել են սեփական կյանքը պատերազմի տարբեր ուղղություններում։
Սակայն, ըստ բանակի ներկայացուցչի, տեղի ունեցածը կարգապահության լուրջ խախտում է, որին «տեղ չկա ՑԱԽԱԼ-ում»։
«Ինչպես և մարտական միջադեպերը, այս դեպքը հրամանատարները կքննեն զինծառայողների հանդեպ հարգանքով, բայց միևնույն ժամանակ՝ կարգապահության բարձր և անփոփոխ չափանիշների պահպանմամբ»,- հայտարարել է բանակի ներկայացուցիչը։
