Ի՞նչ նպատակ են հետապնդում քրդերը սիրիական հակամարտությունում
Ռուսաստանի նախագահ Վլադիմիր Պուտինը նախօրեին հայտարարեց Սիրիայում փետրվարի 27-ին հրադադար հաստատելու վերաբերյալ ԱՄՆ-ի հետ ձեռք բերված պայմանավորվածության մասին: Այսպիսով, Սիրիայի կառավարական զորքերը և զինված ընդդիմությունը ռազմական գործողությունների համար ունեն ընդամենը 4 օր:
5 տարի շարունակվող արյունալի պատերազմում հաղթելու համար հակամարտության կողմերից յուրաքանչյուրին հարկավոր է այս կարճ ժամանակահատվածում ամրապնդել սեփական դիրքերը Թուրքիայի սահմանակից հյուսիսային շրջաններում, որտեղով իրականացվում է զինյալների համալրումը:
Նշենք, որ թուրք-սիրիական 800 կիլոմետրանոց սահմանի զգալի հատվածը՝ երեք քառորդը, վերահսկում են տեղի քրդական ուժերը, որոնք հակամարտության երկու կողմերի և նրանց աջակցող միջազգային ուժերի հետ շահավետ համագործակցության արդյունքում կարողացել են վերահսկողություն հաստատել Սիրիայի տարածքի 14 տոկոսի (26 հազար քառ. կմ ) նկատմամբ. քրդական ուժերն այդ տարածքները հիմնականում նվաճել են «Իսլամական պետությունից»:
Քրդական ուժերն օրերս հերթական նշանակալի հաջողությունն են գրանցել սահմանային Հասակի նահանգում՝ «Իսլամական պետությունից» հետ գրավելով Իրաքի հետ սահմանային Շադադի քաղաքը: Ժողովրդական պաշտպանության ջոկատների (YPG) խոսնակ Ռեդուր Խալիլը օրերս հայտարարել է, որ իրենք մտադիր են նաև գրավել Թուրքիայի սահմանային Ազազ քաղաքը և արտաքսել այնտեղի ահաբեկիչներին: Նշենք, որ այս հայտարարությանը նախորդել էր քրդերին ուղղված ԱՄՆ-ի զգուշացումը՝ ձեռնպահ մնալ ստեղծված հանգամանքների շահագործումից՝ Սիրիայի հյուսիսում նոր տարածքներ նվաճելու համար, փոխանցում է BBC-ն:
Բազմաթիվ վերլուծաբաններ նշում են, որ այս պատերազմում Սիրիայի քրդերի նպատակը քրդական ինքնավարության ստեղծումն է, որը կկապի Հալեպ նահանգում քրդական Աֆրինը, Քոբանին Հասակի նահանգի, Ջազիրայի հետ:
Հարկ է նշել, որ սիրիական հակամարտության նկատմամբ քրդերի դիրքորոշումն որոշակի տրանսֆորմացիաների է ենթարկվել: Եթե հակամարտության սկզբնական փուլում քրդերը հիմնականում հանդես էին գալիս Դամասկոսի իշխանությունների դեմ, ապա այս փուլում սկսել են ավելի շատ համագործակցել Դամասկոսի և նրա դաշնակիցները հետ: Օգտվելով ստեղծված իրավիճակից՝ քրդերը ցանկանում են իրենց համար վճռորոշ դեր ապահովել Սիրիայի ապագա քաղաքական կյանքում:
armedia.am
23/2/2016
