Հունաստանը հայտարարել է թուրքական օդանավերի կողմից իր օդային տարածքի խախտման մասին

Չորեքշաբթի թուրքական վեց ռազմական օդանավեր 138 անգամ խախտել են Հունաստանի օդային տարածքը: Ըստ ՌԻԱ Նովոստիի՝ այս մասին հաղորդել է Հունաստանի ազգային պաշտպանության գլխավոր շտաբը:

Մասնավորապես, թուրքական երկու օդանավեր առավոտյան 7:43-ից մինչեւ 8:41-ը 126 անգամ խախտել են երկրի օդային տարածքը, այդ թվում՝ ութ թռիչք իրականացնելով Իմիա եւ Կալոլիմնոս կղզիների վրայով:

«Բոլոր թուրքական օդանավերը զինված էին եւ բոլոր դեպքերում ճանաչվել են հունական կործանիչների կողմից»,- հաղորդել են գլխավոր շտաբում:

Թուրքիան մշտապես խախտում է Հունաստանի օդային տարածքը, բայց ոչ նման քանակությամբ: Խախտումները գրանցվել են այն բանից հետո, երբ առավոտյան Հունաստանի ազգային պաշտպանության նախարար Պանոս Կամենոսն ուղղաթիռից ծաղկեպսակ է իջեցրել Իմիա կղզիների մերձակայքում, որտեղ 21 տարի առաջ թուրք-հունական կոնֆլիկտի ժամանակ երեք հույն օդաչու է զոհվել:

Կամենոսը հայտարարել է, որ երկրի զինված ուժերը պատրաստ են պատասխանել ցանկացած մարտահրավերի: Նա վստահեցրել է, որ Հունաստանի զինված ուժերի մարտական հզորությունը բարձր մակարդակի վրա է, եւ հույները կպաշտպանեն իրենց հայրենիքը:

News.am