Կատարն արձագանքել է բանակցությունից հրաժարվելու Արաբիայի դիրքորոշմանը
Կատարը դատապարտել է Դոհայի շրջափակմանը վերջ դնելու հարցով բանակցություններ անցկացնելուց հրաժարվելու Արաբիայի դիրքորոշումը:
«Ֆրանս Պրես» լրատվական գործակալության հաղորդման համաձայն՝ Կատարի ԱԳ նախարար Շեյխ Մուհամմեդ Բեն Աբդուլռահման Ալ Սանին անընդունելի է համարել իր երկրի նկատմամբ Սաուդյան Արաբիայի դիրքորոշումը: Նա ասել է.«Այդ դիրքորոշումը հակադրվում է միջազգային հարաբերությունների սկզբունքներին»:
Սաուդյան Արաբիայի ԱԳ նախարար Ադել Ալ Ջուբեյրը երեքշաբթի օրն ընդգծել է.«Կատարի հետ հարաբերությունների նորմալացման համար Արաբիայի ու նրա դաշնակիցների ներկայացրած պահանջների շուրջ Կատարի հետ բանակցությունները բացառված են»:
Կատարի հետ դիվանագիտական հարաբերությունները խզած երկրները, պահանջում են, որ Դոհան դադարեցնի դիվանագիտական կապերն Իրանի հետ: Պահանջների ցուցակում են նաև Al Jazeera հեռուստաալիքի փակումը, Թուրքիայի հետ ռազմական համագործակցության դադարեցումը , երկրում թուրքական ռազմակայանի փակումը և «Համաս» շարժման ու « Մուսուլման եղբայրներ» խմբակցության հետ հարաբերությունների խզումը:
Ավելի վաղ, Ադել Ալ Ջուբեյրը Twitter-ի իր էջում գրել էր, որ Դոհայի հարցով Ռիադի ներկայացրած պահանջները բանակցության ենթակա չեն և Կատարը պետք է դադարեցնի ահաբեկչության ֆինանսավորումը ու ծայրահեղականության բորբոքումն ամբողջ տարածաշրջանում։
Նշենք, որ Սաուդյան Արաբիան, Արաբական Միացյալ Էմիրությունները, Բահրեյնը և Եգիպտոսը հունիսի 5-ին խզել են դիվանագիտական հարաբերությունները Կատարի հետ, նրան մեղադրելով ահաբեկչությանն աջակցելու մեջ:
