Իրաքի իշխանությունները դեմ են Քերքուքի նահանգապետարանի խորհրդի քայլին
Իրաքի վարչապետի խոսնակը դատապարտել է այդ երկրի Քուրդստանի տարածքի անջատման հանրաքվեին միանալու կապակցությամբ Քերքուքի նահանգապետարանի խորհրդի ընդունած որոշումը:
Իրանի ռադիո-հեռուստատեսության լրատվական գործակալության հաղորդման համաձայն, Իրաքի վարչապետ Հեյդար Ալ-Էբադիի խոսնակ Սաըդ Ալ-Հադիսին, երեքշաբթի երեկոյան դատապարտելով Իրաքի Քուրդստանի տարածքի հանրաքվեին միանալու համար Քերքուքի նահանգապետարանի խորհրդում կատարված քվեարկությունը, նշել է, որ այն անօրինական է ու հակասում է երկրի սահմանադրությանը:
«Քուրդստանի տարածքի մաս չկազմող նահանգներն առանց կենտրոնական իշխանության համաձայնության չեն կարող որոշում ընդունել և Քերքուքն էլ մեկն է այդ նահանգներից»,-հայտարարել է Իրաքի վարչապետի խոսնակը:
Իրաքի խորհրդարանի նախագահ Սալիմ Ալ-Ջաբուրին նույնպես հայտարարել է. «Քերքուք նահանգը վարչական ու անվտանգության տեսակետից պատկանում է Բաղդադի կենտրոնական իշխանությանը և Իրաքի Քուրդստանի տարածքը որևէ իշխանություն չունի այդ նահանգի վրա»:
Քերքուքի նահանգային խորհուրդը երեքշաբթի օրը կողմ քվեարկեց 2017 թվականի սեպտեմբերի 25-ին Իրաքի Քուրդստանի տարածքի անջատման կապակցությամբ նախատեսված հանրաքվեին միանալուն:
