Սիրիայում շարունակվում են Ջաբերի Անսարիի խորհրդակցությունները
ԻԻՀ ԱԳ նախարարի արաբա-աֆրիկյան հարցերով տեղակալը հանդիպում ու զրույց է ունեցել Սիրիայի ԱԳ փոխնախարարի հետ:
«Մեհր» լրատվական գործակալության հաղորդման համաձայն, Հոսեյն Ջաբերի Անսարին Սիրիայի պաշտոնատարների հետ խորհրդակցությունների շրջանակում չորեքշաբթի օրը հանդիպել է այդ երկրի ԱԳ փոխնախարար Ֆեյսալ Մեղդադի հետ: Կողմերը մտքերի փոխանակում են կատարել Սիրիայի վերջին զարգացումների և Աստանայի բանակցային գործընթացի շուրջ:
ԻԻՀ ԱԳ նախարարի արաբա-աֆրիկյան հարցերով տեղակալը մինչև Ֆեյսալ Մեղդադի հետ հանդիպումը, տեսակցություն ու զրույց է ունեցել Սիրիայի նախագահ Բաշար Ասադի և ԱԳ նախարար Վալիդ Ալ-Մոալեմի հետ:
Բաշար Ասադի հետ հանդիպման ժամանակ Ջաբերի Անսարին զեկուցելով Սիրիայի առնչությամբ տարածաշրջանային ու միջազգային տարբեր կողմերի հետ ԻԻՀ դիվանագիտական շփումների մասին, ընդգծել է երկու երկրի պաշտոնատարների միջև շարունակական ու սեղմ խորհրդակցությունների անհրաժեշտությունը:
Հանդիպման ժամանակ Բաշար Ասադը շնորհակալություն է հայտնել ահաբեկչության դեմ պայքարում Սիրիայի հանդեպ իսլամական հեղափոխության մեծապատիվ առաջնորդի և Իրանի ժողովրդի ու կառավարության ցուցաբերած հովանավորության կապակցությամբ:
ԻԻՀ ԱԳ նախարարի արաբա-աֆրիկյան հարցերով տեղակալ Հոսեյն Ջաբերի Անսարին երեքշաբթի գիշեր ժամանել է Սիրիայի մայրաքաղաք Դամասկոս:
Հատկանշական է, որ Սիրիայի հարցերով ՄԱԿ-ի հատուկ ներկայացուցիչ Ստեֆան Դի Միստուրան երկուշաբթի օրը ժամանել էր Թեհրան:
Սիրիայի ճգնաժամի վերջին զարգացումներն, ինչպես նաև այս ճգնաժամը քաղաքական երկխոսության միջոցով կարգավորելը Թեհրանում իրանցի պաշտոնատարների հետ Դի Միստուրայի խորհրդակցությունների առանցքն են կազմել:
