Թուրքմենստանում քաղաքացիներին արգելում են բժշկական դիմակ կրել և խոսել կորոնավիրուսի մասին
Թուրքմենստանի կառավարությունը քաղաքացիներին արգելում է բժշկական դիմակ կրել և օգտագործել «կորոնավիրուս» բառը: Հանրային վայրերում կորոնավիրուսի մասին խոսելու համար, քաղաքացիները կարող են ձերբակալվել։
Ինչպես հաղորդում է Թասնիմ լրատվական գործակալությունը, Թուրքմենստանի կառավարությունը ոչ միայն հերքել է այդ երկրի տարածքում կորոնավիրուսի առկայությունը, այլև երկրում բոլոր լրատվամիջոցներին արգելել է հրապարակումներում «կորոնավիրուս» բառի օգտագործումը։
Բառը չի կիրառվել նաև Թուրքմենստանի առողջապահության նախարարության կողմից երկրի ուսումնական հաստատություններ, հիվանդանոցներ և աշխատավայրեր ուղարկված թռուցիկներում։
Նյուզվիքը հղում անելով «Լրագրողներ առանց սահմանների» կազմակերպությանը, հաղորդել է, որ Թուրքմենստանի կառավարությունը ձերբակալում է բոլոր նրանց, ովքեր պաշտպանիչ դիմակ են կրում կամ հանրային վայրերում խոսում են կորոնավիրուսի մասին։
Առողջապահության համաշխարհային կազմակերպության հայտարարության համաձայն՝ Տաջիկստանը և Թուրքմենստանը Կենտրոնական Ասիայի միակ երկրներն են, որտեղ կորոնավիրուսով վարակման դեպք չի արձանագրվել: Այս մասին հաղորդում է Նյուզվիքը։
