Չինաստանը Ռուսաստանի հետ առևտրում չի շրջանցի պատժամիջոցները․ Չինաստանի ԱԳՆ
Չինաստանը մտադիր չէ որևէ հատուկ քայլ ձեռնարկել Արևմուտքի հակառուսական պատժամիջոցները շրջանցելու համար, Պեկինը կշարունակի նորմալ առևտրային հարաբերություններ զարգացնել Ռուսաստանի Դաշնության և այլ երկրների հետ, լրագրողներին ասել է Չինաստանի արտաքին գործերի նախարարության եվրոպական դեպարտամենտի տնօրեն Վան Լուտոնը, գրում է Ինտերֆաքսը։
«Մենք հատուկ ոչինչ չենք անի Ռուսաստանի դեմ ԱՄՆ-ի և Արևմուտքի պատժամիջոցները շրջանցելու համար»,- ասել է նա նախօրեին կայացած Չինաստան-ԵՄ գագաթնաժողովին նվիրված ճեպազրույցում։
Վան Լուտոնն ասել է, որ այլ երկրների հետ Չինաստանի նորմալ տնտեսական համագործակցությունը չպետք է ազդվի՝ ավելացնելով, որ Եվրոպան շարունակում է առևտուրը Ռուսաստանի հետ, ուստի պատժամիջոցները «չպետք է ազդեն Մոսկվայի հետ Չինաստանի նորմալ առևտրային հարաբերությունների վրա»։
Դիվանագետը հիշեցրել է, որ «Չինաստանը հակամարտության կողմ չէ», այն նպաստում է համաշխարհային առևտրի զարգացմանը և հետևողականորեն դեմ է պատժամիջոցների կիրառմանը։
lragir.am
