Պուտինն ու Ասադը քննարկել են ռազմատեխնիկական ոլորտում համագործակցության հարցերը
Ռուսաստանի և Սիրիայի նախագահներ Վլադիմիր Պուտինն ու Բաշար ալ- Ասադը Մոսկվայում կայացած բանակցություններում քննարկել են ռազմատեխնիկական ոլորտում համագործակցության և Դամասկոսի և Անկարայի միջև հարաբերությունների կարգավորման հարցերը:
Լրագրողներին այս տեղեկությունը հայտնել է ՌԴ նախագահի մամուլի քարտուղար Դմիտրի Պեսկովը։
«Ինչ վերաբերում է մեր համագործակցությանն այն ոլորտներում, ինչպիսին է ռազմատեխնիկական համագործակցությունը, դա նույնպես քննարկվել է: Բանակցությունների ոչ բոլոր արդյունքները կարող են հրապարակային լինել հասկանալի պատճառներով», - ասել է Պեսկովը։
Կրեմլի ներկայացուցչի խոսքով՝ բանակցություններում նաև արծարծվել Է Սիրիայի և Թուրքիայի հարաբերությունների կարգավորման թեման։ Բացի դրանից, Պեսկովը հայտնել է, որ բանակցությունների արդյունքում կայացվել Է որոշում, որը թույլ կտա առաջիկա շաբաթներին կամ ամիսներին անցնել Ռուսաստանի և Սիրիայի միջև «առևտրատնտեսական համագործակցության հետագա զարգացման շատ կարևոր փաստաթղթի» ստորագրմանը։ Ռուսաստանի Դաշնության նախագահի մամուլի քարտուղարը բանակցություններն անվանել է առարկայական և նշել, որ դրանց նախորդել են շփումներն արտաքին գործերի և պաշտպանություն նախարարությունների գծով։
Պեսկովը նաև հայտարարել է, որ աշխատանքային մակարդակով մի քանի շփումներ են իրականացվում Թուրքիայի նախագահ Ռեջեփ Թայիփ Էրդողանի և Ասադի հանդիպման նախապատրաստման համար։
Պուտինի և Ասադի բանակցություններն ավարտվել են մարտի 15-ին:
