Չինաստանի վճռական պատասխանը Թրամփի՝ Իրանի դեմ սահմանած պատժամիջոցներին

Չինաստանն Իրանի նավթի խոշորագույն ներկրողն է, և դիտորդների կարծիքով՝ Թրամփի տնտեսական ճնշման նոր քաղաքականությունն ուղղակիորեն թիրախավորում է երեք երկրների, որոնք Իրանի հետ ունեն ամենածավալուն առևտրատնտեսական կապերը՝ Չինաստանին, Արաբական Միացյալ Էմիրություններին և Թուրքիային։

Չինաստանն անհամաձայնություն է հայտնել Իրանի դեմ Թրամփի նոր՝ «տնտեսական պատերազմի» ծրագրին։ Ինչպես հաղորդում է Tabnak-ը՝ վկայակոչելով Asr Iran-ը, Չինաստանի կառավարությունն օգոստոսի 20-ին դեմ է արտահայտվել Իրանի նկատմամբ Թրամփի՝ «տնտեսական արշավին» և ընդգծել հակամարտությանը վերջ տալու համար դիվանագիտական միջոցների կիրառման անհրաժեշտությունը։

Չինաստանի ԱԳՆ խոսնակ Լին Ցզյանը Պեկինում լրագրողներին ասել է․ «Պատժամիջոցների և ճնշման կիրառումը չի նպաստի խնդրի լուծմանը։ Չինաստանը համապատասխան կողմերին կոչ է անում պատասխանատու քայլեր ձեռնարկել և հարցերը լուծել դիվանագիտական ու քաղաքական միջոցներով»։

Օգոստոսի 19-ին Դոնալդ Թրամփը հայտարարել էր «որևէ երկրի դեմ երբևէ իրականացված ամենակործանարար տնտեսական գործողության» մասին և խստացրել Իրանի մեկուսացման իր արշավը՝ Իրանի իշխանություններին աջակցող երկրներին ու ընկերություններին նախազգուշացնելով տնտեսական ծանր հետևանքների մասին։

Նա հայտարարել է, որ ԱՄՆ-ը ձգտում է կտրել այն ֆինանսական և առևտրային ուղիները, որոնք տնտեսական աջակցություն են ապահովում Իրանին։ Նա հավելել է․ «Այսօր ես նաև հայտարարում եմ, որ ցանկացած երկիր, որը թույլ կտա իր ֆինանսական հաստատություններին, ձեռնարկություններին, օդանավակայաններին կամ պետական կառույցներին Իրանի համար որևէ կենսական ուղի ապահովել, կբախվի հսկայական տնտեսական հետևանքների»։

Թրամփը մասնավորապես նշել է նավթի մաքսանենգությունը, ֆինանսական սվոփի մեխանիզմները, կանխիկ դրամի փոխանցումները, փոխանակման կետերը, նավերի գրանցումը և կեղծ ընկերությունների գործունեությունը՝ որպես այն գործողություններ, որոնք պետք է դադարեցվեն։ Նա հայտարարել է․ «Այս ամենը պետք է դադարեցվի հենց հիմա»։

Չինաստանի կառավարությունը դեռ մի քանի ամիս առաջ պատժամիջոցներ էր սահմանել այն չինական ընկերությունների նկատմամբ, որոնք ցանկանում էին ենթարկվել Իրանի հետ նավթային և առևտրային գործարքների դեմ ԱՄՆ-ի երկրորդական պատժամիջոցներին։