Իմրան Խանի կողմնակիցները հարձակվել են Պակիստանի վարչապետի նստավայրի վրա
Պակիստանի նախկին վարչապետ Իմրան Խանի ձերբակալությունից հետո, նրա կողմնակիցները Լահորում հարձակվել են գործող վարչապետ Շահբազ Շարիֆի նստավայրի վրա:
ԻՌՆԱ-ն՝ վկայակոչելով Sputnik-ին, հաղորդում է, որ ցուցարարները հարձակվել են զորանոցների, ոստիկանական բաժանմունքների, բանակի կենտրոնների վրա, թալանել դրանք, իրենց հետ տարել տեխնիկա ու զենք։
Պակիստանի բանակը տեղակայվել է քաղաքներում և տարբեր երկրների հյուպատոսությունների մոտ։ Բանակը հայտարարել է, որ այսօրվանից ցուցարարների նկատմամբ կիրառելու է «երկաթե» վերաբերմունք:
Փենջաբում ոստիկանության բարձրաստիճան պաշտոնյան հայտնել է, որ ցուցարարները հրկիզվող նոյւթեր են նետել վարչապետի տան վրա: Ոստիկանությունը հայտնել է, որ երեքշաբթի և չորեքշաբթի օրը Փենջաբում ցուցարարները հրկիզել են 14 կառավարական շենք և 21 ոստիկանական մեքենա:
Կոռուպցիոն գործով անցնող՝ Պակիստանի «Թեհրիք-ի Ինսաֆ»-ի ղեկավար Իմրան Խանի ձերբակալությունից հետո, իրավիճակը Լահորում և Փենջաբի այլ քաղաքներում լարված է:
Բախումների հետևանքով մինչ այժմ առնվազն յոթ մարդ է զոհվել, ևս 300-ը վիրավորվել է:
