Օվերչուկը Կասպյան հնգյակին առաջարկել է մտածել ԵԱՏՄ-ի հետ մերձեցման մասին
ՌԴ փոխվարչապետ Ալեքսեյ Օվերչուկը Կասպյան հնգյակի երկրներին առաջարկել է մտածել ԵԱՏՄ-ի հետ մերձեցման օգուտների մասին:
«Տարածաշրջանում տնտեսական կապերի ամրապնդմանը նպաստում է Իրանի՝ ԵԱՏՄ-ին որպես դիտորդ պետության անդամակցությունը։ Հրավիրում եմ նաև Կասպյան հնգյակի մյուս մասնակիցներին մտածել ԵԱՏՄ-ի հետ մերձեցման օգուտների մասին», - հայտարարել է Օվերչուկը՝ ելույթ ունենալով Թեհրանում Կասպյան երրորդ տնտեսական համաժողովում։
Ելույթի ընթացքում նա նաև ասել է, որ Ռուսաստանն ու Իրանը գրեթե ամբողջությամբ անցել են ազգային արժույթներով հաշվարկներին: Իրանի հետ առևտրատնտեսական համագործակցության զարգացման ամենահեռանկարային ուղղություններն են՝ էներգետիկան, ավտոմոբիլային և ավիաշինությունը, նավաշինությունը, դեղագործությունը, տրանսպորտային ենթակառուցվածքները:
ԵԱՏՄ-ի փոխադարձ հաշվարկներում ազգային արժույթների մասնաբաժինը կազմում է ավելի քան 92%։
Ներկայում ԵԱՏՄ-ին անդամակցում են Հայաստանը, Բելառուսը, Ղազախստանը, Ղրղզստանը, Ռուսաստանը, դիտորդ պետություններն են՝ Մոլդովան, Ուզբեկստանը, Կուբան, Իրանը։
Կասպյան հնգյակում են՝ Ռուսաստանը, Ադրբեջանը, Իրանը, Ղազախստանը, Թուրքմենստանը:
