Թուրքիան պատրաստ է «անհրաժեշտության դեպքում» զորք ուղարկել Ուկրաինա
ԱՄՆ-ից հետո ՆԱՏՕ-ում երկրորդ ամենամեծ բանակն ունեցող Թուրքիան կարող է մասնակցել Ուկրաինայում հնարավոր խաղաղապահ առաքելությանը, Reuters-ին հայտնել է Թուրքիայի պաշտպանության նախարարության աղբյուրը։
«Առաքելությանը մասնակցելու հարցը կդիտարկվի, եթե դա անհրաժեշտ համարվի տարածաշրջանային կայունության և խաղաղության հաստատման համար, և կգնահատվի բոլոր շահագրգիռ կողմերի հետ համատեղ»,- հայտնել է աղբյուրը։
Եվրոպայի գլխավոր ռազմական տերությունները՝ Մեծ Բրիտանիան և Ֆրանսիան, արդեն քննարկել են զորքեր տեղակայելու հարցը՝ Ուկրաինայում հրադադարի պահպանման հնարավոր մոնիթորինգի ուժերի շրջանակում՝ ապագա խաղաղության համաձայնագրից հետո, մինչդեռ Վաշինգտոնը հայտարարել է, որ այնտեղ ամերիկացի զինվորներ չի ուղարկի:
Ուկրաինան հայտարարում է, որ ցանկացած խաղաղ համաձայնագիր կպահանջի հզոր ուժեր տեղում՝ անվտանգության երաշխիքներ ապահովելու համար: Մոսկվան մերժել է ՆԱՏՕ-ի ուժերի ցանկացած տեղակայում, թեև ԱՄՆ նախագահ Դոնալդ Թրամփը հայտարարել է, որ իր կարծիքով Ռուսաստանը կարող է համաձայնել:
Թուրքական աղբյուրը հայտնել է, որ թուրքական զորքերի տեղակայման շուրջ քննարկումները մնում են հայեցակարգային, և դեռևս կոնկրետ որոշումներ չեն ընդունվել։
Աղբյուրն ընդգծել է, որ եթե Թուրքիան որոշի ուղարկել իր զորքերը, ապա նախ անհրաժեշտ կլինի հրադադար հայտարարել Ուկրաինայի և Ռուսաստանի միջև։
Անցյալ շաբաթ թուրքական լրատվամիջոցները հայտնել էին, որ նախագահ Ռեջեփ Թայիփ Էրդողանը Անկարայում առանձին հանդիպումների ժամանակ քննարկել է հնարավոր տեղակայման հարցը Ուկրաինայի նախագահ Վլադիմիր Զելենսկու և Ռուսաստանի արտգործնախարար Սերգեյ Լավրովի հետ։
news.am
