Գերմանիայի խորհրդարանը հաստատել է 3 միլիարդ եվրոյի ռազմական օգնությունը Ուկրաինային

Pars Today - Գերմանիայի խորհրդարանի (Բունդեսթագ) բյուջետային հանձնաժողովը հաստատել է այս տարի՝ 2025 թվականին 3 միլիարդ եվրոյի լրացուցիչ ռազմական օգնությունը Ուկրաինային:

Ինչպես հաղորդում է Pars Today-ը՝ վկայակոչելով IRNA-ին, Գերմանիայի խորհրդարանի բյուջետային հանձնաժողովը հաստատել է նաև 2026-2029 թվականների համար Կիևին 8,3 միլիարդ եվրոյի ռազմական օգնության հատկացումը:

Այս կապակցությամբ Գերմանիայի կանցլեր Օլաֆ Շուլցը հինգշաբթի օրը՝ մարտի 20-ին, Եվրամիության գագաթնաժողովում հայտարարեց, որ Բեռլինը լրացուցիչ չորս միլիարդ եվրո է նախատեսել Ուկրաինային աջակցելու համար, որով այս տարվա (2025 թ.) համար Կիևին Գերմանիայի ռազմական օգնությունը կհասցվի յոթ միլիարդ եվրոյի, սակայն այդ լրացուցիչ օգնությունը պետք է հաստատվի Գերմանիայի խորհրդարանի կողմից։

ՏԱՍՍ լրատվական գործակալության փոխանցմամբ՝ Բեռլինը Վաշինգտոնից հետո երկրորդ ամենամեծ զենք մատակարարողն է Ուկրաինային, այնպես որ, ըստ Գերմանիայի կառավարության խոսնակ Շտեֆան Հաբստրեյթի, երկիրը ուկրաինական հակամարտության սկզբից ի վեր Կիևին ուղարկել է մոտ 44 միլիարդ եվրոյի տարբեր օգնություն։