Թրամփը Ազգային գվարդիայի զորք է մտցրել Վաշինգտոն. շրջանի ղեկավարը վրդովված է
ԱՄՆ նախագահ Դոնալդ Թրամփը մայրաքաղաքի ոստիկանությանը դաշնային վերահսկողության է տեղափոխել՝ որոշելով Վաշինգտոն (Կոլումբիայի շրջան) ուղարկել Ազգային գվարդիայի 800 մարտիկների՝ «իրավակարգը և հասարակական անվտանգությունը վերականգնելու համար»։ Ուժայինները քաղաք կժամանեն մեկ շաբաթվա ընթացքում։
Այս ամենը տեղի է ունենում Կոլումբիայի շրջանում հանցագործության դեմ պայքարի վերաբերյալ Թրամփի հայտարարության շրջանակում։ «Ավելի վաղ Վաշինգտոն էին ուղարկվել նաև ԱՄՆ այլ ուժային գերատեսչությունների աշխատակիցներ, այդ թվում՝ ՀԴԲ-ի և Ներգաղթի և մաքսային վերահսկողության ծառայության (ICE) հարյուրավոր սպաներ»,– գրում է «Reuters»-ը։
ԱՄՆ նախագահի խոսքով՝ ամերիկյան մայրաքաղաքն այժմ գրավել են դաժան ավազակախմբերն ու արյունարբու հանցագործները, վայրենի երիտասարդության թափառող ամբոխը, թմրամոլ մոլագարները, ինչպես նաև անօթևաններ։ Թրամփը նշել է, որ 2023 թվականին սպանությունների թիվը հավանաբար հասել է քաղաքի պատմության մեջ ամենաբարձր մակարդակին՝ հասնելով 25 տարի առաջվա ցուցանիշների։
«Անօթևանները պետք է անհապաղ տեղափոխվեն։ Մենք ձեզ բնակարան կտրամադրենք, բայց մայրաքաղաքից ՀԵՌՈւ։ Հանցագործների դեպքում հեռանալու կարիք չկա. մենք ձեզ բանտ կուղարկենք, որտեղ էլ հենց պետք է լինեիք։ Պատրաստվե՛ք։ «ԼԱՎ ՏՂԱ» չի լինելու։ Մենք ուզում ենք ՎԵՐԱԴԱՐՁՆԵԼ մեր մայրաքաղաքը», – գրել է Թրամփը «Truth Social» սոցցանցում։
Վաշինգտոնի քաղաքապետ, դեմոկրատ Մյուրիել Բոուզերը վրդովված է նախագահի գործողություններից: Նա Կոլումբիայի ոստիկանության շուրջ տեղի ունեցող իրադարձությունները անվանել է զավթում՝ նշելով, որ քաղաքում հանցավորության աճ չի նկատվում, ինչի մասին խոսում է Թրամփը։
«Թրամփիգործողությունները մտահոգություն են առաջացնում և իսկապես եզակի են մեր պատմության համար: Սակայն մենք շատ զարմացած չենք՝ հաշվի առնելով նրա նախկին հռետորաբանությունը: Ուզում եմ վստահեցնել շրջանի բնակիչներին` մեր իշխանությունները կշարունակեն աշխատանքը․ասել է Բոուզերը :
Կոլումբիայի շրջանի գլխավոր դատախազ Բրայան Շվալբը Թրամփի գործողությունները անվանել է «աննախադեպ, ավելորդ և անօրինական»: Նա գրառում է արել X սոցցանցում` նշելով, որ շրջանում բռնի հանցագործությունների մակարդակն անցյալ տարի հասել է 30 տարվա ամենացածր մակարդակին և տարեսկզբից նվազել է ևս 26%-ով:
