ԵԱՏՄ երկրներում կսուբսիդավորվեն գյուղոլորտի համատեղ նախագծերը
Եվրասիական տնտեսական հանձնաժողովը պատրաստվում է միջոցներ մշակել ագրոարդյունաբերության ոլորտի կոոպերացիոն նախագծերին աջակցելու համար։
Մոսկվայում հրավիրված ասուլիսի ժամանակ այս մասին ասել է ԵՏՀ (ԵԱՏՄ գործադիր մարմին) արդյունաբերության և ագրոարդյունաբերական համալիրի հարցերի նախարար Գոհար Բարսեղյանը։
Հիմա քննարկվում է ագրոարդյունաբերական նախագծերի սուբսիդավորման մեխանիզմը, ինչպես նաև հայտերի ընտրության չափանիշները։ Ի թիվս այլ ոլորտների` ուզում են ուշադրություն դարձնել փոքր տոննաժային քիմիային. առանց դրա արտադրանքի ոչ մի այլ ճյուղ չի կարող գործել։ Բարսեղյանի խոսքով` ԵԱՏՄ երկրներում ներմուծումից կախվածությունը այդ արտադրանքի առանձին տեսակների համար հասնում է 100 տոկոսի։
Ինչ վերաբերում է արդյունաբերական կոոպերացիային, նա հիշեցրել է, որ աջակցության միջոցառումներն արդեն գործում են։ Բիզնեսից արդեն ստացվել է 16 հայտ, որոնցից երեքն արդեն հաստատվել են (բոլորը՝ Ռուսաստանի, Բելառուսի և Ղազախստանի ընկերությունների մասնակցությամբ)։
Պատրաստվածության բարձր աստիճանի է անհատական համակարգիչների արտադրության նախագիծը՝ Ռուսաստանի, Բելառուսի և Ղրղզստանի ընկերությունների մասնակցությամբ, ինչպես նաև երկաթուղային վագոնների համար ինտերիերի արտադրության նախագիծը՝ Ռուսաստանի, Բելառուսի և Հայաստանի ընկերությունների մասնակցությամբ:
Հաստատված նախագծերի համար ԵԱՏՄ բյուջեից սուբսիդավորվում է տոկոսադրույքի մեծ մասը (այն երկրի վերաֆինանսավորման տոկոսադրույքի չափով, որտեղ գտնվում է արտադրությունը)։ Այսպիսով` երեք նախագծերից առաջինի պարագայում մասնակիցները կվճարեն տարեկան մոտ 4%՝ 25%-ի փոխարեն, երկրորդ դեպքում՝ 3%՝ 18%-ի փոխարեն։
