Ամերիկացիների կեսից ավելին դժգոհ է Թրամփի գործունեությունից․ Economist

ԱՄՆ քաղաքացիների ավելի քան կեսը չի հավանում նախագահ Դոնալդ Թրամփի աշխատանքի արդյունքները՝ նրա երկրորդ ժամկետի առաջին տարվա ամփոփմամբ։ Այս մասին ասվում է Economist ամսագրի և YouGov ընկերության հետազոտության մեջ։

Թրամփի աշխատանքին հավանություն է տալիս հարցվածների 39%-ը, մինչդեռ 56%-ը նշել է, որ դժգոհ է դրանից։ Ընդ որում, Դեմոկրատական կուսակցության կողմնակիցների շրջանում հարաբերակցությունը կազմում է 4% (կողմ) և 95% (դեմ), իսկ հանրապետականների շրջանում՝ համապատասխանաբար 88% և 10%։ Այն ընտրողների շրջանում, ովքեր իրենց չեն դասում որևէ կուսակցության կողմնակիցների շարքին, նախագահի գործունեությանը հավանություն է տալիս 27%-ը, իսկ 63%-ը համաձայն չէ նրա վարած գործունեության հետ։

Թրամփի քաղաքականության նկատմամբ ամենացածր վստահությունը նկատվում է 18-ից 29 տարեկանների խմբում, որտեղ նրան սատարում է միայն 29%-ը՝ 66% անվստահության ցուցանիշի դեպքում։ ԱՄՆ գործող նախագահն ամենամեծ աջակցությունն ունի 65 տարեկանից բարձր անձանց շրջանում՝ 45% հավանության ցուցանիշով։ Այդուհանդերձ, նույնիսկ այս խմբում դժգոհողների թիվն ավելի բարձր է՝ 54%։

Հետազոտությունն անցկացվել է դեկտեմբերի 26-ից 29-ը՝ ԱՄՆ չափահաս քաղաքացիների շրջանում։ Սխալի չափը  հայտնի չէ։

Ամերիկյան լրատվամիջոցների և սոցիոլոգների հարցումների արդյունքները ցույց են տալիս Թրամփի վարկանիշի անկում. Economist ամսագիրը և YouGov ընկերությունն այն անվանում են ամենալուրջը վերջին ամերիկյան նախագահների շրջանում։ NORC հետազոտական կենտրոնը և Associated Press գործակալությունը, հիմնվելով իրենց հարցման արդյունքների վրա, հայտնել են տնտեսության մեջ ամերիկյան առաջնորդի մոտեցումների նկատմամբ աջակցության մակարդակի անկման մասին։ Politico պարբերականը հրապարակել է Public First ընկերության հետ համատեղ հետազոտության արդյունքները, որոնց համաձայն՝ ԱՄՆ բնակիչների մոտ կեսը դժվարություններ ունի կենցաղային ծախսերը հոգալու հարցում, ներառյալ՝ սննդամթերքի, դեղորայքի գնումը և կոմունալ վճարումները։

Թրամփն իր հերթին մեղադրում է սոցիոլոգներին Միացյալ Նահանգների տնտեսության վիճակի մասին ստելու մեջ։