ԱՄՆ Ներկայացուցիչների պալատը Իրանի դեմ պատերազմը դադարեցնելու վերաբերյալ բանաձև է ընդունել
ԱՄՆ Ներկայացուցիչների պալատը Դոնալդ Թրամփի պատերազմական լիազորությունների վերաբերյալ բանաձև է ընդունել, որով կոչ է արվում դադարեցնել Իրանի դեմ ռազմական հարձակումները։ Բանաձևն ընդունվել է դեմոկրատների և մի շարք հանրապետականների աջակցությամբ։
Հղում անելով IRNA-ին, Pars Today-ը հաղորդում է, որ ԱՄՆ Ներկայացուցիչների պալատը չորեքշաբթի երեկոյան տեղական ժամանակով բանաձև է ընդունել ԱՄՆ նախագահ Դոնալդ Թրամփի պատերազմական լիազորությունների վերաբերյալ, որի նպատակն է դադարեցնել ռազմական գործողություններն Իրանի դեմ։
Բանաձևն ընդունվել է 215 կողմ և 208 դեմ ձայներով։ Քվեարկության ընթացքում մի շարք հանրապետական ներկայացուցիչներ նույնպես միացել են դեմոկրատներին և աջակցել են ծրագրին։ Արդյունքների հրապարակումից հետո Ներկայացուցիչների պալատում լսվել են օրենսդիրների ծափահարությունները։
ԱՄՆ Ներկայացուցիչների պալատի խոսնակ Մայք Ջոնսոնը նախկինում փորձել էր կանխել բանաձևի ընդունումը։ Նա երկու շաբաթ առաջ օրինագիծը հանել էր Ներկայացուցիչների պալատի օրակարգից, հենց այն պահին, երբ այն պատրաստվում էր դրվել քվեարկության։
Սակայն, Իրանի դեմ շարունակվող պատերազմը և դրա դադարեցման համար արագ լուծում գտնելու հարցում Թրամփի վարչակազմի դժվարությունները ԱՄՆ քաղաքական դաշտում ընդդիմության ալիք են բարձրացրել։
Մեն նահանգի դեմոկրատ ներկայացուցիչ Ջարեդ Գոլդենը, որը նախորդ երեք անգամ դեմ էր քվեարկել օրինագծին, այս անգամ միացել է բանաձևի կողմնակիցների շարքերին, ինչը նպաստել է դեմոկրատների շրջանում կոնսենսուս ձևավորելուն։
ԱՄՆ Սենատը մայիսին ներկայացրել էր նմանատիպ օրինագիծ՝ Իրանի դեմ պատերազմում նախագահի պատերազմական լիազորությունները սահմանափակելու համար, որը աջակցվել էր չորս հանրապետական սենատորների և գրեթե բոլոր դեմոկրատների կողմից։ Սակայն Սենատում Ներկայացուցիչների պալատի բանաձևի քննարկման ամսաթիվը դեռևս որոշված չէ։
Ներկայացուցիչների պալատի դեմոկրատ առաջնորդ Հակիմ Ջեֆրիսը, աջակցելով ծրագրին, հայտարարել է․ «Այս անիմաստ, թանկարժեք և ավելորդ պատերազմը պետք է ավարտվի այսօր»։
Միևնույն ժամանակ, Էլիզաբեթ Ուորենը չորեքշաբթի օրը իր X էջում գրել է, որ Իրանի դեմ Դոնալդ Թրամփի պատերազմը ամերիկյան ընտանիքներին մինչ օրս արժեցել է 100 միլիարդ դոլար։
«Դա մոտավորապես 750 դոլար է մեկ տնային տնտեսության համար», - հավելել է նա։
