Հեմմաթի․ Իրանի տնտեսության փլուզման մասին պնդումները քաղաքական հայտարարություններով իրականություն չեն դառնա
Իրանի Կենտրոնական բանկի նախագահը, արձագանքելով ԱՄՆ ֆինանսների նախարարի՝ Իրանի տնտեսության փլուզման մասին պնդումներին, վկայակոչել է իրացվելիության ծավալի և արժութային շուկայի զարգացումների վիճակագրական տվյալները՝ ընդգծելով, որ երկրի տնտեսական վիճակը պետք է գնահատել չափելի ցուցանիշներով, այլ ոչ թե ամերիկացի պաշտոնյաների քաղաքական հայտարարություններով։
Վկայակոչելով IRIB-ը՝ Pars Today-ը հաղորդում է, որ Աբդոլնասեր Հեմմաթին նշել է․ «Իրանի տնտեսության փլուզման համար ԱՄՆ ֆինանսների նախարար Սքոթ Բեսենթի սահմանած երկշաբաթյա ժամկետն ավարտվել է կիրակի օրը։ Սակայն ԱՄՆ ֆինանսների նախարարը, այդ պնդման արդյունքների մասին բացատրություն տալու փոխարեն, խոսել է Իրանում դրամ տպելու մասին»։
Վկայակոչելով Կենտրոնական բանկի վիճակագրական տվյալները, Հեմմաթին հավելել է, որ իրացվելիության տարեկան աճի տեմպը ամռանը գրանցված 56,4 տոկոսից սեպտեմբերին նվազել է մինչև 51,6 տոկոս։ Նրա խոսքով՝ սեպտեմբերին իրացվելիության աճը կազմել է 1,3 տոկոս, ինչը տվյալ ժամանակահատվածում արձանագրված ամենացածր ցուցանիշն է։
Իրանի Կենտրոնական բանկի նախագահը նաև հայտարարել է, որ բանկի միջամտության արդյունքում արժութային շուկայում կանգնեցվել և նույնիսկ հակառակ ուղղությամբ է շրջվել փոխարժեքի աճի միտումը, որը ձևավորվել էր սպասումների ազդեցությամբ։
Նշելով, որ երկիրը բախվում է տնտեսական ճնշումների, իսկ քաղաքացիները՝ տարբեր դժվարությունների, Հեմմաթին ընդգծել է, որ պատժամիջոցները, սպառնալիքներն ու քաղաքական հայտարարություններն ինքնին չեն ապացուցում տնտեսության փլուզումը։ Նրա խոսքով՝ տնտեսական իրավիճակը պետք է գնահատել իրական տվյալների և չափելի ցուցանիշների հիման վրա։