Սպահանի Նոր Ջուղայի սրտում գտնվող Քեշիշի պատմական առանձնատունը հայերի ժառանգության մասնիկներից է
Սպահանի Նոր Ջուղա թաղամասում գտնվող Քեշիշի պատմական առանձնատունը Ղաջարների ժամանակաշրջանի ճարտարապետության հիշատակ է և իրանական ու հայկական մշակույթների պատմական կապի խորհրդանիշ։ Պատերի որմնանկարներով, նրբաճաշակ ծեփազարդերով և գունավոր պատուհաններով այս առանձնատունը ներկայացնում է քաղաքի հայերի մշակութային ու պատմական ինքնության մի մասը։
Ինչպես հաղորդում է Tasnim լրատվական գործակալությունը, պատմական առանձնատունը գտնվում է Սանգթարաշհա փողոցում՝ Զեյթուն փակուղում։ Նախկինում այն եղել է Նոր Ջուղայի հայտնի հայ հոգևորականներից Գարեգին Հանանյանի բնակավայրը։ Նրա գերեզմանը գտնվում է Սուրբ Ամենափրկիչ եկեղեցու հարևանությամբ։
Շինության ճարտարապետությունը՝ կենտրոնական բակով, փիրուզագույն ջրավազանով, փայտե դռներով և կամարաձև, գունավոր ապակիներով պատուհաններ ունեցող սենյակներով, Ղաջարների ժամանակաշրջանի իրանական ճարտարապետության օրինակ է։ Աղյուսի, փայտի և գաջի համադրությունը՝ իրանական ու եվրոպական մոտիվներով զարդարված որմնանկարների հետ, առանձնահատուկ տեսք է հաղորդում այս առանձնատանը։
Վերջին տարիներին Քեշիշի առանձնատունը վերականգնվել է և վերածվել ավանդական ոճով հյուրատան ու զբոսաշրջա
յին համալիրի։
Ճարտարապետական արժեքից բացի՝ այս շինությունն արտացոլում է Սպահանում հայերի դարավոր ներկայությունն ու Նոր Ջուղայի պատմական թաղամասում մշակութային և կրոնական համակեցությունը։ Այն կարող է կարևոր դեր ունենալ մշակութային զբոսաշրջության զարգացման և իրանական ու հայկական ընդհանուր ժառանգության ներկայացման գործում։
