Ադրբեջանն արձագանքել է Եվրոխորհրդարանի ընդունած բանաձևին
Ադրբեջանի խորհրդարանն արձագանքել է այդ երկրում խոսքի ազատության մասին Եվրոխորհրդարանի ընդունած բանաձևին:
ԱՓԱ լրատվական գործակալության ուրբաթ օրը կատարած հաղորդման համաձայն, Ադրբեջանի խորհրդարանի նախագահի առաջին տեղակալն արձագանքելով Բաքվի կառավարության դեմ Եվրոխորհրդարանի ընդունած բանաձևին, ասել է, «Այս բանաձևն ընդունվել է հապճեպ պայմաններում և որևէ արժեք չի ներկայացնում»:
Զիաֆաթ Ասկարովը հավելել է. «Ադրբեջանում մամուլի և խոսքի ազատության ոչ-գովելի վիճակի ու նաև Աֆղան Մուխթարլիի կալանավորման կապակցությամբ Եվրոխորհրդարանի ընդունած բանաձևը Բաքվի իշխանությունների դեմ բացասական քարոզչության ու հատկապես Եվրոպայում ակտիվ հայկական լոբբի ջանքերի արդյունքն է»:
Նրա ընդգծմամբ, Ադրբեջանը չի անդամակցում ԵՄ-ին և Եվրոխորհրդարանի բանաձևերի դիմաց որևէ պատասխանատվություն չի կրում:
Հիշեցնենք, որ Եվրոխորհրդարանն անցած օրն Ադրբեջանում մամուլի և խոսքի ազատության ոչ-գովելի վիճակի ինչպես նաև ադրբեջանցի լրագրող Աֆղան Մուխթարլիի Վրաստանում կալանավորվելու և Ադրբեջան արտահանձնվելու կապակցությամբ բանաձև ընդունեց:
Վրաստանում աշխատող ադրբեջանցի ընդդիմադիր լրագրող Աֆղան Մուխթարլին հունիսի սկզբին անհայտ անձանց կողմից առևանգվելով տեղափոխվել էր Բաքու: Կեղծ արտարժույթ կրելու մեղադրանքով նրա դեմ խափանման միջոց է ընդունվել եռամսյա կալանքը:
Նա երկրորդ քաղաքական ակտիվիստն է, որ հունիս ամսին կեղծ արտարժույթ կրելու մեղադրանքով կալանավորվել է Ադրբեջանի ու Վրաստանի սահմանին:
