Հրդեհ է բռնկել Ֆրանսիայի «Պալյուել» ատոմակայանում

Ֆրանսիայում սաստիկ հրդեհ է բռնկել «Պալյուել» ատոմային էլեկտրակայանում, որը գտնվում է երկրի հյուսիսում:

Ինչպես հայտնել է ատոմակայանի տնօրինությունը, կրակը բռնկել է այն արտադրամասի մեքենասրահում, որտեղ գտնվում էին օբյեկտի օժանդակ ագրեգատներ, տեղեկացնում է «Արմենպրես»-ը:

Շտապ կարգով էլեկտրակայանի տարածք ժամանած յոթ տասնյակ հրշեջներին ավելի քան 6 ժամ է պահանջվել, որպեսզի լիովին հաղթահարեն բռնկումը: Կրակի ջերմաստիճանն այնքան բարձր է եղել, որ մեքենասրահում սկսել են հալչել մի քանի տեսակի մետաղներ:

ԱԷԿ-ի տնօրինության տվյալներով՝ հրդեհի հետևանքով ճառագայթաակտիվ նուկլիդների արտանետում տեղի չի ունեցել: Հրդեհի սկսվելուց հետո ամբողջ անձնակազմը հասցրել է հեռանալ շենքից:

«Պալյուել» ատոմակայանը գտնվում է Նորմանդիայում՝ Ծովամերձ Սենի դեպարտամենտում, Դիեպ քաղաքից մոտավորապես 40 կիլոմետր հեռավորության վրա: Կայանն ունի չորս էներգաբլոկ: Ներկայում աշխատում են դրանցից երեքը: Էլեկտրակայանի անձնակազմը բաղկացած է 1250 աշխատակիցներից, հաղորդել է ՏԱՍՍ-ը:

Lurer.com