ՀԱՊԿ-ն ՄԱԿ-ի առաջարկությամբ հայտարարել է խաղաղապահ ոստիկանություն ստեղծելու մասին
ՀԱՊԿ-ն ՄԱԿ-ի առաջարկությամբ աշխատում է մշտական պատրաստության խաղաղապահ ոստիկանության ստորաբաժանում ստեղծելու շուրջ, որը կմասնակցի խաղաղապահ գործողություններին։ «ՌԻԱ Նովոստի»-ի փոխանցմամբ՝ այս մասին հայտնել է կազմակերպության գլխավոր քարտուղարի տեղակալ Վալերի Սեմերիկովը։
«ՄԱԿ-ի առաջարկությամբ եւ խնդրանքով այժմ մենք ստեղծում ենք մշտական պատրաստության հատուկ ոստիկանական ստորաբաժանում, որը կմասնակցի ՄԱԿ-ի խաղաղապահ առաքելության գործողություններին»,-ասել է Սեմերիկովը։
Նա նշել է, որ նման ստորաբաժանման աշխատակիցները կընտրվեն բոլոր պետությունների իրավապահ մարմիններից։
«Կառույցն (նման ստորաբաժանման) արդեն քննարկել է Անվտանգության խորհրդի քարտուղարության հանձնաժողովը, մեր առաջարկությունների մասին կզեկուցենք նախագահներին։ Բոլոր պետությունները հավանություն են տվել, մենք ստեղծում ենք ոստիկանական ուժերի մշտական պատրաստության հատուկ խաղաղապահ ստորաբաժանում»,-հավելել է Սեմերիկովը։
Նա հիշեցրել է, որ ՄԱԿ-ը ՀԱՊԿ-ի խաղաղապահներին համարում է իր ստանդարտներին համապատասխան եւ հաստատել, որ նրանք կարող են մասնակցել գործողությունների երրորդ երկրներում։
News.am
