Մեկնարկել է մուսուլման հոգևոր առաջնորդների եվրոպական ուղևորությունը
Մի քանի երկրների մուսուլման հոգևոր առաջնորդները և աղոթապետերը սկսել են իրենց եվրոպական ուղևորությունը ,նախ այցելելով Փարիզի այն վայրերը, որտեղ վերջերս ահաբեկչական հարձակումներ են իրականացվել: Այս մասին հաղորդում է Reuters գործակալությունը:
Ահաբեկչական հարձակումների զոհերի հիշատակը մեծարելու և բռնությունը դատապարտելու նպատակով Ֆրանսիայի, Բելգիայի, Բրիտանիայի և Թունիսի մուսուլման հոգևոր առաջնորդներն ու աղոթապետերը մյուս կրոնական համայնքների ներկայացուցիչների ուղեկցությամբ շաբաթ օրը այցելել են Փարիզի այն թաղամասը, որտեղ հրաձգության հետևանքով մի ոստիկան է սպանվել:
Այս ծրագրի կազմակերպիչներն ասել են, որ Փարիզից մեկնելու են Բեռլին հանդիպելու Գերմանիայի կանցլեր՝ Անգելա Մերկելին: Նրանք նաև կայցելեն Բրյուսել և Նիս քաղաքներ և հուլիսի 14-ին կվերադառնան Փարիզ:
Ֆրանսիայի Նիս քաղաքում 2016 թվականի հուլիսի 14-ի երեկոյան բեռնատար մեքենան մխրճվել է ազգային տոնի առիթով քաղաքի կենտրոնական հատվածներից մեկում հավաքված ամբոխի մեջ, ապա կրակ բացել մարդկանց ուղղությամբ:
Մզկիթի աղոթապետ Հասան Շալղումին France Inter ռադիոկայանին տված հարցազրույցում ասել է.«Մեր կրոնը և իսլամական արժեքները դեմ են այդ ահաբեկիչներին»:
