Պենտագոն. Հյուսիսային Կորեայի փորձարկած հրթիռը միջին հեռահարության է եղել
ԱՄՆ պաշտպանության նախարարությունը (Պենտագոն) մի հաղորդագրություն հրապարակելով, գնահատել է Հյուսիսային Կորեայի վերջին հրթիռային փորձարկումը և հայտարարել, որ արձակված հրթիռը միջին հեռահարության է եղել:
Ճապոնիան երեքշաբթի վաղ առավոտյան տեղեկացրեց Հյուսիսային Կորեայի մայրաքաղաք Փխենյանի մերձակա մի տարածքից հրթիռի արձակման մասին:
ԱՄՆ պաշտպանության նախարարության հաղորդագրության մեջ ասված է, որ Պենտագոնը մոնիտորինգի է ենթարկել Հյուսիսային Կորեայի հրթիռային վերջին փորձարկումը և նախնական գնահատումները վկայում են, որ այդ հրթիռը միջին հեռահարության է եղել և արձակվել է «Սոնան» ավիաբազայից:
Պենտագոնը հայտարարել է, որ հրթիռը նախքան Խաղաղական օվկիանոսի ջրերում ընկնելն անցել է Ճապոնիայի օդային տարածքից:
ԱՄՆ պաշտպանության նախարարությունը նաև հայտարարել է, որ փորձարկված հրթիռը որևէ սպառնալիք չի ներկայացնում Հյուսիսային Ամերիկայի և Գուամում գտնվող ամերիկյան զորակայանների համար, հավելելով, որ Վաշինգտոնը ուշադրությամբ հետևում է Փխենյանի քայլերին:
Ավելի վաղ, ԱՄՆ նախագահ Դոնալդ Թրամփն արձագանքելով Փխենյանից հրթիռի արձակմանը, Հյուսիսային Կորեային նախազգուշացրել էր, որ բոլոր այլընտրանքները մնում են սեղանի վրա:
