Էրդողան.««Իրանը Թուրքիայի համար կարևոր ռազմավարական գործընկեր է»
Թուրքիայի հանրապետության նախագահն Իրանի իսլամական հանրապետությանը համարել է իր երկրի ռազմավարական գործընկերը:
Ռեջեբ Թայիբ Էրդողանը հավելել է.«Իրանը Թուրքիայի ռազմավարական գործընկերն է: Անկարան մտադիր չէ հանուն ԱՄՆ-ի դադարեցնել Իրանի հետ հարաբերությունները և միանալ Իրանի դեմ պատժամիջոցներին: Դա հակադրվում է աշխարհում անկախության մասին մեր ըմբռնմանը»:
Ընդգծելով, որ Թուրքիան իր էներգետիկան ստանում է Իրանից, Էրդողանը հավելել է.«Թուրքիան հուսով է,որ Թեհրանի դեմ պատժամիջոցների կապակցությամբ սխալ քայլ չի արվի»:
Թուրքիայի արտաքին գործերի նախարար Մևլութ Չավուշօղլուն երեքշաբթի օրը Ադրբեջան կատարած այցի շրջանակում իր պաշտոնակցի հետ մամլո համատեղ ասուլիսի ժամանակ ասել է. «Անկարան պարտավոր չէ միանալ ԱՄՆ-ի հակաիրանական պատժամիջոցներին»:
Անցած շաբաթ ԱՄՆ-ից մի պատվիրակություն է այցելել Անկարա և այդ երկրի քաղաքական ու տնտեսական պաշտոնատարներին կոչ է արել հակաիրանական պատժամիջոցների կիրառման հարցում աջակցել ԱՄՆ-ին, բայց Թուրքիայի իշխանությունները մերժել են պատվիրակության դիմումը՝ դա համարելով սխալ որոշում:
Վաշինգտոնը աշխարհի երկրներին կոչ է արել զրոյի հասցնել իրանական նավթի ներմուծումը: Աշխարհի շատ երկրներ հայտարարել են, որ չեն հետևելու ԱՄՆ-ի որոշմանը:
