Հանուն գթած և ողորմած Աստծո:Ողջույն հղելով բարության մարգարե Մոհամմադի անմար հիշատակին եւ բարեւելով Ձեզ հարգելի ռադիոլսող բարեկամներ ներկայացնում ենք «Ելք դեպի լույս» հաղորդումը, Ղուրանի մատչելի մեկնաբանությամբ:

Ֆորղան սուրահի 60-րդ այա

وَإِذَا قِیلَ لَهُمُ اسْجُدُوا لِلرَّحْمَنِ قَالُوا وَمَا الرَّحْمَنُ أَنَسْجُدُ لِمَا تَأْمُرُنَا وَزَادَهُمْ نُفُورًا

Երբ անհավատներին պատվիրեք, որ երկրպագեն Ողորմածին, նրանք կհարցնեն . «Ո՞վ է Ողորմածը», և կհավելեն. «Քո խոսքի հիման վրա՞ պիտի պաշտենք նրան»: Ու նրանց ամբարիշտությունը կավելանա:

Կռապաշտները խոնարհվում էին կուռքերի առջև ու պաշտում դրանց: Հենց այդ պատճառով էլ Աստծո մարգարեն ասում է. «Ոչ միայն չպիտի պաշտեք կուռքերին, այլ նաև ձեզ պես մարդկանց: Քանի որ պետք է միայն պաշտել ու խոնարհվել նրա առջև, ով իր գթությամբ արարել է ձեզ ու դուք մշտապես օգտվում եք նրա տված բարիքներից»: Սակայն այս տրամաբանական խոսքերն ընդունելու փոխարեն, կռապաշտներն ասում էին. «Ո՞վ է գթածը: Մենք նրան չենք ճանաչում: Մենք չենք պաշտելու նրան, ում դու ես առաջարկում»։

Այս այայից սովորում ենք.

1. Խոնարհումը աստվածապաշտության խորհրդանիշն է:

2.  Նրանք, որ ասում են, որ մուսուլման են, սակայն նամազ չեն անում ու չեն խոնարհվում Աստծո առջև, հավասար են  կռապաշտներին:

3. Ճշմարիտ խոսքն ազդում է նրանց վրա, ովքեր ունակ են ընդունել այն: Գոռոզամիտ մարդիկ չեն կարող ընդունել նման ճշմարտությունը:

Ֆորղան սուրահի 61 և 62-րդ այաներ

تَبَارَکَ الَّذِی جَعَلَ فِی السَّمَاء بُرُوجًا وَجَعَلَ فِیهَا سِرَاجًا وَقَمَرًا مُّنِیرًا

وَهُوَ الَّذِی جَعَلَ اللَّیْلَ وَالنَّهَارَ خِلْفَةً لِّمَنْ أَرَادَ أَن یَذَّکَّرَ أَوْ أَرَادَ شُکُورًا

Օրհնյալ լինի Նա, որ երկինքներում աստղերի համար բնակավայր հաստատեց և ստեղծեց ցերեկվա ջահն ու լուսաշող լուսինը, (որոնք Իր զորության նշաններն են):

Նա հաստատեց գիշերն ու ցերեկը, որոնք հաջորդում են իրար: Սրանք նշաններ են նրանց համար, որոնք մտածում են ու իրենց երախտապարտ են զգում:

Այս այաներն ասում են, որ Աստված կարիք չունի, որպեսզի մարդիկ իրեն պաշտեն, որովհետև Աստված ամենակարող է և ամեն ինչ գտնվում է նրա իշխանության տակ՝ ողջ տիեզերքը աստղերը, լուսինն ու արևը: Այաներն ասում են. Գիշերն ու ցերեկը ստեղծել է Աստված: Եվ եթե երկիրը պտտվում է արևի շուրջը, դա տեղի է ունենում Աստծո կամքով: Լուսաբացն ու մայրամուտը նույնպես Աստված է ստեղծել: Ուրեմն, պետք է հիշեք այս ամենն ու երախտագետ լինեք:

Այս այաներից սովորում ենք.

1. Տիեզերքը ստեղծել է բարեգութ Աստված:

2․Գիշերն ու ցերեկը նույնպես ստեղծել է Աստված և պետք է դրա համար էլ փառաբանել Նրան:

2. Ճշմարտությունը տեսնելը դեռ ամեն ինչ չէ: Ճշմարտությանը կարող են հասնել միայն նրանք, ովքեր ունեն դրա ցանկությունը: Հակառակ դեպքում, նրանք լիովին չեն ընկալելու ճշմարտությունը:

Ֆորղան սուրահի 63-րդ այա

وَعِبَادُ الرَّحْمَنِ الَّذِینَ یَمْشُونَ عَلَى الْأَرْضِ هَوْنًا وَإِذَا خَاطَبَهُمُ الْجَاهِلُونَ قَالُوا سَلَامًا

Ողորմածի ծառաները նրանք են, որոնք այս աշխարհի վրա ապրում են խոնարհությամբ ու անգետների հարցերին պատասխանում են մեղմաբար:

Այս այան ներկայացնում է հավատացյալների առանձնահատկությունները, որպեսզի պարզվի, թե ո՞վքեր են նրանք: Առաջին հերթին, Ղուրանն ասում է, որ հավատացյալները գոռոզամիտ չեն: Նրանք հեզ են ու համեստ: Ղուրանն ասում է, որ Աստծո արարածը պետք է հեզ լինի ու նույնիսկ քայլելիս խոնարհաբար քայլի:
Ասրա սուրահի 37-րդ այան ասում է . «Երկրի վրա մեծամտորեն մի քայլիր: Դու հաստատ չես ճեղքելու երկիրը և չես հասնելու սարերի բարձրությանը»։

Հավատացյալների հաջորդ առանձնահատկությունը նրանց համբերատարությունն է: Նրանք պետք է մեծահոգաբար պատասխանեն սխալ խոսքերին և կռվելու փոխարեն, լինեն քաղաքավարի ու հանգիստ:

Այս այայից սովորում ենք.

1. Հավատացյալ մարդը պետք է ուշադրություն դարձնի իր բնավորությանը և հասարակական արժեքներին:

2. Համեստությունը յուրաքանչյուր ճիշտ հավատացյալի առանձնահատկություններից է:

3. Սխալ խոսքերի ու արարքների դիմաց համբերատարությունը թուլության նշան չէ, այլ մեծահոգության:

4. Տգետների հետ չի կարելի վարվել իրենց նման: Պետք է հեռանալ նրանցից: Իսկ նրանց, որ սխալ են մտածում, պետք  է ճիշտ կերպով փոխանցենք ճշմարտությունը: