Ելք դեպի լույս 772
Հանուն գթած և ողորմած Աստծո: Ողջույն հղելով բարության մարգարե Մոհամմադի անմար հիշատակին եւ բարեւելով Ձեզ հարգելի ռադիոլսող բարեկամներ, ներկայացնում ենք «Ելք դեպի լույս» հաղորդումը, Ղուրանի մատչելի մեկնաբանությամբ:
Ահզաբ սուրահի 69-րդ այա
Ո՛վ հավատացյալներ, մի՛ նմանվեք նրանց, որոնք նախատեցին Մովսեսին: Աստված նրան զերծ պահեց զրպարտություններից, ու նա հարգված էր Աստծու կողմից:
Քանի որ հրեաներն ապրում էին Մեդինայում ու շփվում մուսուլմանների հետ, նրանք Մովսեսի դեմ ուղղված հերյուրանքները տարածում էին նաև մուսուլմանների շրջանում: Այս այան, դիմելով մուսուլմաններին, ասում է. «Զգուշացեք, որպեսզի Մովսեսի դեմ ուղղված հերյուրանքները դուք չտարածեք, քանի որ Աստծու մարգարեն եղել է առաքինի ու ճշմարիտ: Ուրեմն չպետք է հեղինակազրկել նրան, ով հեղինակություն է վայելում Աստծու մոտ»:
Այս այայից սովորում ենք.
1. Թշնամիների սադրանքներից մեկը մուսուլմանների հոգևոր առաջնորդներին հեղինակազրկելն ու զրպարտելն է:
2. Աստծուն հավատալու համար անհրաժեշտ է հավատալ նաև աստվածային մարգարեներին ու հեռու մնալ նրանց զրպարտելուց:
3. Աստված առաքինի մարդկանց պաշտպանում է թշնամիներից:
Ահզաբ սուրահի 70-րդ և 71-րդ այաներ
یَا أَیُّهَا الَّذِینَ آمَنُوا اتَّقُوا اللَّهَ وَقُولُوا قَوْلًا سَدِیدًا
Ո՛վ հավատացյալներ, երկնչեք Տիրոջից: Թող ճշմարտությունն իշխի ձեր խոսքերի վրա:
(Աստված) ձեր արարքները արժանավոր կդարձնի ու քավել կտա ձեր մեղքերը: Նա, ով հնազանդվի Աստծուն և Նրա մարգարեին, գերագույն երանություն կվայելի:
Այս այաներն ասում են, որ պետք է զգուշանալ և ասեկոսեներ չտարածել ու պետք է ասել միայն ճշմարիտ խոսքը: Այդ խոսքը պետք է լինի ամուր ու հիմնավորված և խնդիրներ չառաջացնի ուրիշների համար: Բնականաբար, եթե հավատացյալներն ուշադիր լինեն իրենց խոսքերին և անհիմն շշուկներ չտարածեն ու չդատեն ուրիշներին իրենց կասկածների հիման վրա, հասարակությունը կբարեփոխվի: Աստված ներում է նրանց, ովքեր հասկանում են, որ սխալվել են: Ուրեմն առաքինի և բարեպաշտ լինելու հիմնաքարը զրպարտությունից ու անհիմն խոսքերից հեռու մնալն է:
Վկայակոչելով իմամ Սաջջադին, ասում են. «Լեզուն ամեն օր մարմնի մյուս մասերից հարցնում է նրանց որպիսությունը և նրանք պատասխանում են. «Մենք լավ ենք, եթե դու թույլ տաս»:
Այս այաներից սովորում ենք.
1. Հավատքի պարտադիր պայմանն առաքինի ու բարեպաշտ լինելն է ու ճշմարիտ խոսքին հետևելը:
2. Պետք է ոչ միայն գեղեցիկ խոսել, այլ նաև բովանդակալից:
3. Եթե մարդը բարեպաշտ լինի, Աստված նրա սխալները կների ու կառաջնորդի դեպի ճշմարտություն:
Ահզաբ սուրահի 72-րդ և 73-րդ այաներ
Մենք առաջարկեցինք երկինքներին, երկրին ու լեռներին, որ (հավատքի) պահապանները լինեն: Բայց նրանք մերժեցին և վախեցան (այս նվիրական բեռը կրել): Սակայն մարդը կրեց դա: Հիրավի, նա անօրեն ու անմիտ եղավ:
Աստված պիտի պատժի կեղծ բարեպաշտ տղամարդկանց ու կանանց և կռապաշտ տղամարդկանց ու կանանց: Հավատացյալ տղամարդկանց ու կանանց ներողամիտ աչքով պիտի նայի, քանզի գթած ու անհիշաչար է Նա:
Այս այաները Ահզաբ սուրահի վերջին այաներն են: Դրանք անդրադառնում են շատ կարևոր հարցի՝ հավատարմությանը: Եվ դա միայն մարդուն է տրված: Իսկ ո՞րն է աստվածային հավատարմությունը: Այն վերաբերում է հոգուն: Այսինքն՝ այն հոգուն, որ Աստված տվել է մարդուն և նրան առանձնացրել կենդանիներից: Այն հոգին, որ մարդու բանականության հենքն է և որը մարդուն տալիս է ընտրելու հնարավորություն: Մարդն առանց հոգու չի կարող կատարյալ լինել:
Մյուս էակները նման հնարավորություն չունեն: Սակայն մարդն Աստծու շնորհիվ արժանացել է այս մեծ արժանիքին: Աստված, որն այս բարիքը տվել է մարդուն, նրանից պահանջել է դրանից ճիշտ օգտվել և երջանկացնել իրեն ու հասարակությանը: Սակայն մարդկանցից շատերը, գերի դառնալով անհավատությանն ու երեսպաշտությանը, սխալ վարքագիծ որդեգրելով, չեն կարողացել այդ աստվածային հավատարմությանն արժանի լինել: Հավատացյալները սայթաքել են, իսկ մյուսները տգիտության պատճառով մոլորվել են աստվածային ուղուց ու չեն կարողացել պահպանել աստվածային հավատարմությունը: Իհարկե, այնուամենայնիվ, մարդիկ հնարավորություն ունեն դուրս գալ մոլորությունից և ընտրել ճիշտ ճանապարհ:
Այս այաներից սովորում ենք.
1. Մարդն Աստծու ներկայացուցիչն է տիեզերքում: Աստված մարդուն բազմաթիվ արտոնություններ է տվել: Այս արտոնությունները մարդուն տրվել են, որպեսզի նա ճիշտ օգտվի դրանցից:
2. Իսլամի տեսանկյունից, բռնությունն իրականացվում է ոչ միայն ուրիշների այլ նաև ինքն իր նկատմամբ, ինչը խանգարում է մարդու առաջընթացին:
3. Մարդու նկատմամբ վստահությունը պետք է զուգորդվի պատասխանատվությամբ, հակառակ դեպքում, մարդը կարժանանա Աստծու պատժին:
4. Տղամարդիկ ու կանայք հավասար են կատարելության հասնելու կամ նվաստանալու հարցում: