طالبان: حکومتي کارکونکي دې خپلو دفترونو ته راستانه شي
طالب ډلې د افغانستان له حکومتي کارکونکو وغوښتل چې د خپل کار ځایونو ته ورستانه شي
د افغانستان شفقنا خبري آژانس رپورټ ورکړی چې په قطر کښې د طالبانو د سیاسي دفتر مرستیال مشر عبدالسلام حنفي پرون وویل: د سفارتي کدرونو، پوځي اډو او مدني ادارو کارکونکي بې له هیڅ ډول اندیښنې خپل کارونه جاري ساتلې شي.
هغه زیاته کړه: د هیڅچا په حقوقو به تیری ونه شي او ښځې هم کولې شي چې د حجاب او پردې په خیال ساتلو سره خپل کار جاري وساتي.
د طالبانو دغه جګ پوړي غړي څرګنده کړه: طالبان د یو ائتلافي حکومت د جوړولو په لړ کښې د یو مرکز د برابرولو کوشش کوي او مونږ ټول به په کښې ګډون وکړو.
عبدالسلام حنفي ټینګار وکړ چې د افغانستان خدمت به وکړي که په مدني برخه کښې وي او که په نظامي برخه کښې هیڅ کس به خپل امتیازات له لاسه ور نه کړي.
په عین حال کښې د طالبانو ویاندوي ذبیح ا... مجاهد پرون په یو ټویټ کښې ولیکل: هیڅ څوک د افغانستان د تیرو حکومتي چارواکو د ګواښلو او ځورولو اجازه نه لري.
