د طالبانو او د قطر او د ترکیې خبرې بندون ته رسیدلي
اوا خبري اژانس وايي طالبانو د افغانستان د هوايي ډګرونو د مدیریت لپاره د قطر او د ترکیې له حکومتونو سره د خبرو اترو د بندون خبر ورکړ .
د طالبانو چارواکو پرون وویل د افغانستان د پلازمینې د کابل هوايي ډګر په شمول د هیواد د پینځو (۵) هوايي ډګرونو د مدیریت کولو د تړون په هکله د قطر او د ترکیې د استازیو او د افغانستان د چارواکو ترمینځ خبرې اترې له هغه وروسته له بندون سره مخ شوې چې د طالبانو استازیو ټینګار درلود چې د افغانستان ځواکونه به د دغو هوايي ډګرونو امنیتي مسوولیت پرغاړه واخلي .
د طالبانو د موقته حکومت د ټرانسپورټ وزارت مخکې ویلي وو که چیرې د دغو هوايي ډګرونو د مدیریت د سپارلو بهیر د ملي ګټو پراساس نه وي د قطر او د ترکیې له هیڅ شرکت سره په تړون لاسلیک نکړي .
افغانستان حاضردمه پینځویشت (۲۵) هوايي ډګرونه لري خو په تیرو وختونو کښې اکثره الوتونه په کابل ، هرات، مزارشریف او قندهار هوايي ډګرونو کښې ترسره کیدل .
حاضردمه د افغانستان اریانا او کام ایر هوايي شرکتونه له کابل څخه متحده عربي اماراتو، قطر ، پاکستان ، ایران او روسیې ته الوتونه لري خو د خارجي هیوادونو د هوايي شرکتونو د الوتونو هیڅ درک نه لګي .
