په بلخ کې یو سوداګر تښتول شوی
په بلخ کې د طالبانو د امنیه قومندانۍ ویاند محمد آصف وزیري د دغه سوداګر د تښتول کیدو خبر تایید کړی او ویلي، چې د موندلو هڅې ېې روانې دي.
د افغانستان له شمالي ولايتونو سمنګان او بلخ څخه د یوه صراف د وژل کیدو او یوه سوداګر د تښتول کیدو خبرونه ورکړل شوي.
د صراف نوم حاجي احمد ياد شوی او ویل شوي، چې د کابل- بلخ پر لويه لاره وسله والو غلو وژلی او ۸۰ زره ډالره یې ترې وړي دي.
له بلخ څخه د تښتول شوي سوداګر په اړه ويل شوي، چې خواجه صدیق صدیقي نوميږي او د تاج طلایي په نوم د یوه شرکت رییس و.
په بلخ کې د طالبانو د امنیه قومندانۍ ویاند محمد آصف وزیري د دغه سوداګر د تښتول کیدو خبر تایید کړی او ویلي، چې د موندلو هڅې ېې روانې دي.
په وروستيو کې د کابل په ګډون د هېواد له مختلفو سيمو څخه د جنايي او نورو پېښو د زیاتېدو خبرونه ورکړل شوي.
د طالبانو د کورنیو چارو وزارت وياند عبدالنافع ټکور په یوه خبري غونډه کې وویل، په تېره یوه مياشت کې ۸۳۱ تنه د بېلابېلو جرمونو په تور نیول شوي، ۱۰تنه اختطافګر د طالبانو له امنیتي ځواکونو سره په مخامخ نښتو کې وژل شوي او ۳۹ تنه نور ژوندي نیول شوي دي.
د خلکو په باور، د طالبانو له واکمنيدو سره که د دوی لخوا په کیدونکو جګړو او بریدونو کې د تلفاتو لړۍ دریدلې، خو د فقر او اقتصادي ناورين له کبله نورې جنایي پېښې، ځان وژنې، کورنی تاوتریخوالی او په ټوله کې وژل او د تشدد نورې بڼې دوام لري.
