طالبانو د هوايي چلند پخوانی مشر له بللو وروسته بندي کړی
محمود شاه حبيبي څو مياشتې مخکې د طالبانو د اړیکو د کمیسیون په بلنه افغانستان ته ستون شوی و.
دافغانستان د ملکي هوايي چلند د ادارې د پخواني مشرمحمود شاه حبيبي کورنۍ وايي،چې طالبانو نوموړی له شاوخوا یوې نېمې مياشتې راهيسې بندي کړی،چې دوی یې تر اوسه له برخليک څخه نه دي خبر.
د نوموړي ورور احمد شاه حبيبي په یوه ویډیويي پیغام کې ویلي،چې طالبان د هغه د نيولو لپاره یو ځل په داسې مهال کور ته ورغلي وو،چې کور کې نارينه نه وو او دوی سره له دې هم کور ته ننوتي او له ښځو څخه ېې د حبيبي ځینې کاري وسايل وړي وو.
محمود شاه حبيبي څو مياشتې مخکې د طالبانو د اړیکو د کمیسیون په بلنه افغانستان ته ستون شوی و.
د هغه د نيولو په اړه طالبانو څه نه دي ويلي.
د حبيبي د کورنۍ په وینا، نوموړي له تېرو دریو کلونو راهيسې کومه دولتي دنده نه لرله او په کابل کې د یوه خصوصي شرکت کارکوونکی و.
