طالبانو د سیاسي مشرانو په راستنیدا ټینګار وکړ
صدای افغان خبري اژانس راپور ورکړی د طالبانو د بهرنیو چارو وزیر امیر خان متقي د پخواني حکومت له چارواکو او د مخالفانو د ائتلاف له غړیو وغوښتل چې افغانستان ته د بیرته راستنیدا په ترڅ کښې په شرافت سره ژوند پیل کړي.
څه موده مخکې د افغانستان له سیاستوالانو، پوځیانو او ګوندي شخصیتونو جوړ د طالبانو یوشمیر مخالفانو د یوه ائتلاف په جوړولو سره د طالبانو له یواړخیزه سیاستونو سره د مخالفت کولو په ترڅ کښې د دغه ډلې د حکومت د نسکورولو لپاره په جدي مبارزې او د پراخ بنسټه حکومت په جوړولو ټینګار وکړ.
د طالبانو د باندنیو چارو وزیر امیر خان متقي په یوې ویډیو کښې چې پرون په اینټرنیټ سایټونو باندې خپره شوه د دغو تشکلونو غړیو ته په خطاب کښې وویل د یوشمیر پیسو په خاطر باید د نورو بندګي ونه مني.
امیر خان متقي ټینګار وکړ د نورو هیوادونو نوکرۍ کولو نه مخکې کومه ګټه لرله او نه به له دې وروسته کومه ګټه ولري.
دا په داسې حال کښې دي چې څه موده مخکې د افغانستان د پخواني ولسمشر مرستیال محمد سرور دانش د «عدالت و ازادي افغانستان» په نوم او محمد حنیف اتمر او ځینو نورو سیاستوالانو هم د «حرکت ملي صلح او عدالت» په نوم یو بل ګوند جوړ کړی و.
له دې مخکې هم د افغانستان د ځینو سیاستوالانو لخوا د افغانستان د ژغورنې لپاره د ملي مقاومت لوړه شورا جوړه کړي وه.
دغه ټول تشکلونه د افغانستان د باندې جوړ شوي دي.
