پاکستان د تورخم درواره د باروړونکو موټر پر مخ وتړله
زمونږ خبریال راپور راکړی دا په تیره یوه اونۍ کې دویم ځل دی چې پاکستان د تورخم دروازه بندوي.
د تورخم پوځي کمیسار مولوي عصمت الله یعقوب خبري رسنیو ته ویلي ،پاکستان غوښتل د ډیورنډ پولې ته څیرمه د صفر نقطې په شل مترۍ کې د یوې سترې لوحې د نصبولو په پلمه اوسپنیزه دروازه جوړه کړي چې افغان پوله ساتو ځواکونو یې مخه ونیوله. مولوي عصمت الله یعقوب وویل ،پاکستاني پوځیانو یې په غبرګون کې د تورخم دروازه د باروړنکو موټرو د تګ راتګ پر مخ وتړله.
د تورخم پوځي کمیسار ویلي ،د دروازې د بیاپرانستلو په موخه هر ډول خبرو اترو ته چمتو دی خو پر وینا یې چې پاکستاني لورې تر اوسه د خبرو اترو بلنه نده ورکړې تیره اونۍ هم پاکستاني لورې د افغان موټر چلوونکو سره د پاسپورت او ویزې د نه شتون په پلمه د تورخم دروازه تړلې وه چې دخبرو اترو په پایله کې له څو ساعتونو وروسته په مشروط ډول بیرته پرانستل شوه.
په دې وروستیو کې د پاکستان له لورې په پرله پسې ډول د تورخم دروازې تړل کیدو او افغان سوداګرو ته د ستونزو راولاړولو له امله افغان سوداګر اړ شوي چې تر دې وروسته خپل سوداګریز توکي د پاکستان د کراچۍ بندر پر ځای د ایران اسلامي جمهوریت د بندرعباس او چابهار بندرونو له لارې هیواد ته وارد کړي.