افغانستان ورستنو شویو کډوالو ته ځمکې ورکوي نور حال دلته واورئ
زمونږ خبریال راپور راکړی د افغانستان کرنې او مالدارۍ وزارت چارواکي وایي له پاکستان نه راویستل شویو کډوالو ته د سرپنا جوړولو لپاره زمکه ورکوي.
د کرنې وزارت چارواکو پر وینا د دغو کډوالو لپاره یې د کار موندنې طرحه هم چمتو کړی ده.
د افغانستان کرنې او مالدارۍ سرپرست وزیر «عطا الله عمري» د یو لوړپوړي پلاوي په ملتیا تورخم ښارګوټي ته د سفر او هلته له پاکستان نه د راستنو شویو کډوالو لپاره له چمتو شوي میشت پنډ غالي نه د لیدنې پرمهال وویل سرپرست حکومت له پاکستان نه راستنوشویو هغه کډوالو لپاره چې د سرپناه لپاره خپله زمکه ونه لري د استوګني ددوه سوه زره نمرو د ویش پریکړه کړې ده.
د کرنې او مالدارۍ سرپرست وزیر وویل هغه کورنۍ چې د غړو شمیر یې لس تنه وي هغوې ته به د سرپناه جوړولوپه موخه لس بسوي او که شمیر یې تر هغې پورته وي زیاته زمکه ورکړل شي.
مولوي «عطا الله عمري» وویل د اوس لپاره د زمکو نومرو شمیر دوه سوه زره دی چې د اړتیا له مخې به یې شمیر زیات شي.
د کرنې او مالدارۍ سرپرست وزیر دغه راز وویل دحکومت له لورې جوړشوي د راستنیدونکو کډوالو ستونزو ته د رسیدو کمیسون د املاکو ویش کمیتې چې مشري یې د ده پرغاړه ده همدا راز د چمتو کړي طرز العمل له مخې پریکړه کړې چې راستنو شویو کډوالو کورنیو ته د کارموندنې برخه کې دولتي زمکې د اوږدمهال لپاره په پنځوس سلنه ارزانه بیه او له داوطلبۍ پرته په اجاره ورکړي.
همدارنګه به ترې حکومت د لومړي کال اجاره هم نه اخلي.
د کرنۍ او مالدارۍ سرپرست وزیر ننګرهار او کندوز ولایتونه د پراخو دښتو او اوبو په لرلو سره د کډوالو لپاره د سرپنا او روزګار مناسبې سیمې وبللې.
دطالبانو سرپرست حکومت داسې مهال راستنو شویو بې زمکو کدوالو لپاره دسرپنا جوړولو په موخه د زمکې ویش خبره کوي چې ډیری راستنې شوي کورنۍ د سرپنا د نه شتون له امله شکایتونه کوي او ورځ تر بلې دا غوښتنې اوشکایتونه مخ پر زیاتیدو دي.
