طالبان: په ګډه پوله دیوال وهل د ایران حق دی
د ایران له لوري له افغانستان سره په ګډه پوله د دېوال د درولو په اړه د طالبانو حکومت په لومړني غبرګون کې وویل چې دا د ایران حق دی.
د تسنیم خبري اژانس د راپور له مخې، د طالبانو د حکومت مرستیال ویندوی حمد ا... فطرات وویل، “ایران غواړي چې په خپله خاوره کې پوله بنده کړي، دا د ایران حق دی چې دا پروژه اجرا کوي، او کولی شی د خپلو سرحدونو د ښه امنیت لپاره امنیتي ګامونه واخلي. ایران به د پولې د بندولو د پروژې تطبیق له اسلامي امارت سره په موافقې او همغږۍ اجرا کړي.”
د ایران د پوځ د مځکنیو ځواکونو قوماندان سیروس امان الهي مخکې ویلي و: “د ایران او افغانستان ترمنځ د راکړو ورکړو او نورو تعاملاتو د کچې د زیاتوالي له امله، مونږ په ګډو په سرحدونو کې د امنیت د زیاتوالي شاهدان یوو، او د امنیتي ځواکونو په حضور امنیت دوه برابره ښه شوی دی.”
هغه د ایران ختیځې پولې ته د خپل سفر په ترڅ کې وویل: “د دې لپاره چې په ایران کې دننه دوامداره امنیت ډاډمن شي، له افغانستان سره د ایران د ۳۳۰ کیلومتره ختیځې پولې د بندولو پروژه به د دې کال تر پایه بشپړه شي.”
د ایراني چارواکي په وینا، په خراسان رضوي ، خراسان جنوبي ، او سیستان او بلوچستان ولایتونو کې د سرحدونو د بندولو چارې به په راتلونکو دریو کلونو کې بشپړې شي.
ایران په وروستیو کې د افغان کډوالو د نیولو او افغانستان ته یې د راستنولو بهیر ګړندی کړی دی خو یو شمېر ایراني چارواکي وايي، تر څو چې یې خپلې پولې بشپړه کنټرول کړي نه وي، د کډوالو د ورتګ ستونزه نه حل کېږي.
د طالبانو له واک ته رسیدو وروسته، په افغانستان کې د بې روزګارۍ د ډېرېدو او اقتصادي بحران له کبله، میلیونونه نور افغانان ایران ته راغلي دي.
