د افغان ښځو لپاره د امریکا ځانګړې استازې استعفا وکړه
زمونږ خبریال راپور راکړی د افغانستان لپاره د ښځو او بشري حقونو په برخه کې د امریکا ځانګړې استازې «رینا امیري» وویل له خپلې دندې استعفا کوي.
امیري نن پر اېکس پاڼه لیکلي چې د امریکا د نوي ولسمشر د لوړې له ورځې هممهاله استفعا کوي.
هغې زیاته کړې د بشري حقونو پر بنسټ له افغان ښځو دفاع او د هغوی لپاره کارکول ورته لوی ویاړ و.
مېرمن امیري څرګنده کړې چې ډېر کار پاتې دی، خو په وینا یې په تېرو درېیو کلونو کې د افغان ښځو د حقونو لپاره د مبارزې پیاوړي بنسټونه جوړ شوي دي.
هغې د نړۍ له ټولو هېوادونو غوښتي چې د افغانستان له زړورو ښځو او نارینه وو ملاتړ وکړي.
امیر د افغان ښځو د ملاتړ په برخه کې په تېرو درېیو کلونو کې لاسته راوړنو ته په اشارې سره ویلي چې د دغه بهیر دوام به افغانستان د یوې روښانه او د بشري حقونو پر بنسټ ولاړې ټولنې پر لور بوځي.
هغې دغه راز د ښځو د حقونو په اړه د طالبانو د کړنو پر وړاندې د زیات فشار غوښتنه کړې ده.
په افغانستان کې باورونه دا دي چې ډیپلوماتیک فشار د طالبانو پر درې کلنو ناوړه کړنو دومره اغېز نه دی کړی.
د افغانستان خلک ټینګار کوي چې ځواک او زور کولای شي طالبان بدلون ته اړ باسي.
