د فراه پر پوله د ایران او افغانستان د ترانزیت ستونزې هوارېږي

د افغانستان او ایران چارواکي د فراه ولایت په سرحدي نقطه کې د ترانزیټي ستونزو د کمولو او د سوداګریزو توکو د لېږد د اسانتیا په اړه د هوکړې وروستي پړاو ته رسېدلي دي.

د فارس خبري اژانس په لیکنه، د فراه والي محمد حافظ مجاهد د دې ولایت د سرحدي نقطې د لیدنې پر مهال له ایراني چارواکو سره د ترانسپورتي ستونزو د کمولو او د سوداګریزو مالونو د چټک لېږد په اړه خبرې وکړې.

تر دې وړاندې افغان سوداګرو تل د ایران پر پولو، په ځانګړي ډول د فراه په نقطه کې، د ترانزیټ د ورو بهیر شکایت کړی و. د لاریو اوږده کتارونه، پېچلي ګمرکي تشریفات او د دواړو خواوو د ادارو ترمنځ د همغږۍ نشتوالی د دې لامل کېده چې د توکو لېږد څو ورځې وځنډېږي.

د تفتیش د وخت کمول، د پولې د کاري ساعتونو زیاتول او د ګمرکي کړنلارو یو شان کول هغه موارد دي چې دواړه لوري پرې د نظر تبادله کوي.