تمدن: نور د چوپتیا او زغم دوام توجیه نه لري
زمونږ خبریال راپور راکړی د افغانستان تمدن ټلویزیون د طالبانو له خوا د خاتمالنبیین مدرسې د محاصرې په غبرګون کې ویلي چې له دې وروسته به چوپتیا ونه کړي او خپلو خپرونو ته به د خواله شبکو له لارې د پراخو فعالیتونو په لومړیتوب دوام ورکړي.
نوموړي ټلویزیون پرون په خپله فیسبوک پاڼه کې لیکلي چې د ستونزو د سولهییز او ارام حل په موخه یې د خپرونو له دوامه ډډه کړې او زغم یې غوره کړی و.
د دغې رسنۍ د اعلامیې له مخې، د طالبانو له لوري د خاتمالنبیین مدرسې له محاصرې، د زدهکوونکو او استادانو له ځورونې وروسته، د چوپتیا او زغم دوام نور هېڅ توجیه نه لري.
دغې رسنۍ ویلي چې خپلې خپرونې به د خواله شبکو له لارې د پراخو فعالیتونو په لومړیتوب بېرته پیل کړي او د پوهېدو په موخه به ټول اسناد، مدارک او د طالبانو له عدلیې وزارت سره شوې خبرې اترې له خلکو سره شریکې کړي.
دا په داسې حال کې ده چې پرون د طالبانو د عدلیې وزیر عبدالحکیم شرعي په امر طالبان خاتمالنیین مدرسې ته ورغلي او هغه یې محاصره کړې ده.
له دې مخکې د تمدن ټلویزیون خپرونې هم بندې شوې وې.
د تمدن ټلویزیون رییس او د خاتمالنبیین علمي حوزې د بنسټګر محمداصف محسني لمسی محمدجواد محسني وايي چې طالبانو د دغه بنسټ ۱۲ استادان نیولي دي.
محسني پرون په فیسبوک پاڼه کې لیکلي چې دا استادان د طالبانو د عدلیې وزارت له خوا یاد بنسټ ته د نورو جنګیالیو له لېږد وروسته نیول شوي دي.
محسني ویلي چې د دغه بنسټ برېښنا هم پرې شوې ده.
د محسني په خبره، د طالبانو د عدلیې وزارت له خوا دغه بنسټ ته لېږل شوي ځينې کسان پر وسلو سمبال دي او ځينې نور یې لرګي او ډنډې لري.
له دې مخکې سرچینو هم د دغه بنسټ د ځينو استادانو د نیول کېدو پخلی کړی و.
راپورونه ښيي چې د طالبانو د دغه ګام پر ضد ځينو کسانو اعتراض کړی او هغوی له معترضانو سره تاوتریخجن چلند کړی دی.
