بهرنیان دې په افغانستان کې د خپلو عسکرو جنګي جرمونه نه پټوي
د ورسیې د بهرنیو چارو وزارت وایي، په افغانستان کې د غربي حکومتونو له لورې د جنګي جرمونو د ارقامو پټ ساتل د زغم وړ نه دي.
دغه څرګندونې د روسیې د بهرنیو چارو د وزارت ویاندې «ماریا زاخارووا» کړې دي. نوموړې ویلي « موږ په افغانستان کې د ملکي وګړو په وړاندې جنګي جرمونه په کلکه غندو او د بریطانیې او نیوزلینډ له ادارو هیله لرو، چې خپلې څېړنې بشپړې او د دې جرمونو تر شا حقایق راوسپړي؛ تر څو ټولو ته انصاف ورسېږي.»
نوموړې د دې تر څنګ ټینګار کړی چې بهرني پوځیان باید د جنګي جرمونو مخنیوی وکړي، ځکه په خبره یې، له دې کار پرته د نړیوالې ترهګرۍ په وړاندې بریا ناشونې ده.
یاده دې وي، چې په افغانستان کې د بهرنیو پوځیانو د جنګي جرمونو کیسې لومړۍ نه دي، بهرنیانو په افغانستان کې په ځلونو د خپلو ټوپکو شپیلۍ پر ملکي وګړو ور اړولې دي؛ خو تر دې دمه د دې ډول پېښو قربانیانو ته هیڅ انصاف نه دی رسېدلی.
څه موده وړاندې کله چې د جنګي جرمونو نړیوالې محکمې وغوښتل، یاد جرمونه وپلټي د امریکایي چارواکو له لوري ورته سخت ګواښونه وشول.
په ورته وخت کې، کابو یوه اوونۍ وړاندې د امریکا ولسمشر هغه دوه پوځي چارواکي هم وبخښل چې په افغانستان کې په جنګي جرمونو تورن وو او امریکایي محکمو ورته د بند سزا اورولې وه.
