په دوحه کې د دوهم دور خبرو لپاره مقدماتي ناسته وشوه
د سولې په چارو کې د د افغان حکومت وزارت وایي د افغان دولت او طالبانو مذاکراتي پلاوو د دوهم دور خبرو لپاره مقدماتي ناسته وکړه.
د دغه وزارت ویاندې ناجیه انوري وایي چې تېر ماښام د دواړو مذاکراتي پلاوو ترمنځ لومړۍ ناسته وشوه او په ناسته کې پرېکړه وشوه چې د راتلونکې شنبې ورځ به بله ناسته ترسره شي.
په ورته مهال په قطر کې د طالبانو د سیاسي دفتر ویاند محمد نعیم وردګ هم پر خپله ټوېټر پاڼه د دغه خبر پخلی کړی او لیکلي یې دي چې د دواړو لوریو ترمنځ د بین الافغاني مذاکراتو دویم پړاو مقدماتي ناسته تر سره شوې.
د نوموړي په خبره په ناسته کې پرېکړه شوې چې د راروانې شنبې په ورځ به د دواړو خواوو لخوا د اجنډا د موضوعاتو د څېړلو لپاره ټاکل شوي ټیمونه خپل کارونه پیل کړي.
که څه هم د جنورۍ میاشتې پنځمه نیټه د دوهم دور د مذاکراتو د پیل نېټه ټاکل شوې وه؛ خو لومړۍ مقدماتي ناسته د جنورۍ په شپږمه نېټه ترسره شوه.
