په قندهار کښې ۶۲ طالبان ووژل شول

د افغانستان د دفاع وزارت په قندهار ولایت کښې طالبانو ته د درنې مرګ ژوبلې خبر ورکړ.

له دغه وزارت څخه نن په خپره شوې خبرپاڼه کښې لیکل شوي چې طالبان تېره ورځ د قندهار په ارغنداب، پنجوایي او ډنډ ولسوالیو کښې راټول شوي وو او په افغان عسکرو یې د برید پلان جوړۀ.

خبرپاڼه زیاتوي چې د افغان عسکرو په ګډو عملیاتو او د هوائي ځواکونو د بریدونو په مهال ۶۲ طالبان ووژل شول او ۲۳ نور ژوبل شول.

سرچینه وایي، په دغو بریدونو کښې د هغوی دوه د پټېدو ځايونه او په ډېره کچه وسلې هم له منځه یوړل شوې.

همدارنګ په خبرپاڼه کښې د ۸۳ ماینونو شنډېدو خبر هم ورکړل شوے دے.