د ملابرادر په مشرۍ د طالبانو پلاوی ترکمنستان ته تللی

روسیې ته تر سفر وروسته د ملابرادر په مشرۍ د طالبانو یو پلاوی ترکمنستان هېواد ته تللی دی.

په دوحه کې د طالبانو د سیاسي دفتر ویاند محمد نعیم وردک رسنیو ته ویلي چې دغه سفر د ترکمنستان هېواد په رسمي بلنه ترسره شوی دی.

د وردک په وېنا طالب پلاوی به د ترکمنستان له لوړپوړو چارواکو سره د افغانستان او دغه هېواد تر منځ پر سوداګریزو اړیکو، سیاسي پرمختګونو او نورو اړوند مسایلو بحثونه ترسره کړي.

طالبان پر داسې مهال یاد سفرونه کوي چې په دوحه کې د سولې په هدف د مرکچي پلاویو تر منځ خبرې په ټپه درېدلې دي.