د ایران تیلي صادرات بندېدونکي نه دي
پارس ټوډې - د ایران د حکومت ویاندې د تیلو پر وزیر د بندیز په غبرګون کې، پر دې په ټینګار سره چې د ایران تیلي صادرات بندېدونکي نه دي، ولیکل: که چېرې پخواني تحریمونه ګټور وو، نو نويو تحریمونو ته اړتیا نه وه.
د پارس ټوډې د راپور له مخې، د ایران د حکومت ویاندې «فاطمه مهاجراني» پرون شنبه په "ایکس" ټولنیز شبکې کې ولیکل: کله چې په چټکۍ سره پر پاکنژاد باندې بندیز لګوي، نو دا د دې معنا لري چې د تیلو وزارت له فعالیت او حرکت څخه اندیښمن دي.
د ایران د حکومت ویاندې څرګنده کړه چې د ایران تیلي صادرات بندېدونکي نه دي او د ایران برخه په نړیوال تیلي بازار کې خوندي ده.
د امریکا خزانې وزارت د مارچ په ۱۳مه، په یوه بیانیه کې اعلان وکړ: د بهرنیو مالیې د کنټرول دفتر (OFAC) د ایران د تیلو پر وزیر «محسن پاکنژاد» چې د ایران د لسګونه میلیارده ډالرو د تیلو د صادراتو څارنه کوي، بندیز لګولی دی.
له دې تحریم وروسته، د تیلو وزارت په یوه بیانیه کې اعلان وکړ: پر محسن پاکنژاد بندیز، د ایران د تیلوپلورلو لپاره د هغه د هڅو په سبب، د امریکا د اعظمي فشار د تګلارې له وروستي اقدامونو څخه دی او دا بندیزونه په داسې حال کې پلي شوي چې د هغه د وزارت له مودې څخه تراوسه اووه میاشتې هم بشپړې شوي نه دي.
