د حماه پوځي هوايي ډګر له منځه ولاړ
پارس ټوډې – د سوریې د بهرنیو چارو وزارت اعلان وکړ: د حماه پوځي هوايي ډګر د صهیونیسټي رژیم په بمبارۍ کې تقریباً له منځه ولاړ.
د پارس ټوډې د راپور له مخې؛ د سوریې د بهرنیو چارو وزارت نن سهار په یوې بیانیې کې د دغه هېواد پر مختلفو سیمو باندې د صهیونیسټي رژیم هوایي بریدونه وغندل.
په دغه بیانیه کې راغلي چې پر پنځو سیمو باندې د صهیونیسټي رژیم په هوایي بریدونو کې چې په دېرشو دقیقو کې ترسره شول، د حماه پوځي هوایي ډګر تقریباً په بشپړه توګه ویجاړ شو او په لسګونه ملکیان او پوځیان ژوبل شول.
د سوریې د بهرنیو چارو وزارت زیاته کړه: دغه تیری د سوریې د سولې او ثبات د ګډوډولو او د دغه هېواد د خلکو د ستونزو د اوږدولو لپاره قصدي هڅه ده.
سوریې له نړیوالې ټولنې وغوښتل چې د یوه قاطع دریځ په غوره کولو سره، پر اسرائیلي رژیم فشار راوړي چې د سوریې پر خاوره خپل بریدونه ودروي او د ۱۹۷۴ کال د اوربند د موافقې له مخې پر خپلو ژمنو عمل وکړي.
